الريس مرسى جامد لأنى فعلاً مفلس!!

طيب.. تصدقوا بالله بقى؟؟؟ طالما قال "من يتحدث عن الإفلاس .. هو مفلس!!"، يبقى بيتكلم صح!! أنا بقالى من ساعة ما الريس العياط شرف، وأنا بتكلم عن الإفلاس لأنى بالفعل مُفلس!!! الريس ده عنده بُعد نظر بقى، على فكرة!! جامد وعرف يقرا فكر المواطن الغلبان وهو فوق فى قصره!! يا سلام على أبو الأمراس!! ده إيه الحلاوة دي؟؟!! قول يا شيخ .. قول كمان .. ده أنت كده فعلاً بقيت على الخط المتين وحاسس بالكادحين!!

وفعلاً بقيت حاسس إن "انتمائى" بينزل .. ومن كثر النزول حصلعّ .. وشكلى لازم أعمل "استزراع" شعر .. لأن كده العملية فى البوظان!! الخطاب ده جامد جامد يعني!! أول خطاب أفهمه للريس مرسي!! أصل كمان الريس مرسى كان هادى فى الخطاب ده، .. مش زى الخطابات اللى قبل كده، ومثلاً زى خطاب "خطة اللعب فى الملعب": لما كان بيشوح ويهدد ويقول إنه عارف كل شىء بيعمله الـ 3 .. 4 .. 5 بتوع القضا فى الملعب!! فاهم الفولة الراجل ده!! ريس كهين الحقيقة!! داهية!!

وأيام خطاب الاستاد لما اتكلم عن "التريسكل" و"الأنبوبة" و"الأبضاي" و"الجرسة" كانت حوسة ياجدعان .. وجبت القاموس علشان أفهم هو بيقول إيه .. بس المرة دى الكلام كان واضح .. وما بلش "الصوبع الرئاسى المُبجل" وهو بيقلب الورق (ربنا يُحرس الصوبع ده يا رب .. ويا ريت لو سمحتم ما حدش يتعرض ليه، لأن إهانة الريس مرسى من الموبقات .. عيب كده منك ليه ليها)!!

وكويس أن مصر مش حتفلس ولا حتركع .. كفاية المواطنين يفلسوا ويركعوا لوحديهم .. بس مصر فوق أى شىء .. جامد يا ريس مرسى .. إيه الجمال ده؟؟؟ أول مرة أحس إنك مصرى فى الخطاب ده!! أصل فى الخطابات اللى قبل كده لما كنت بتهدد الشعب، ما حستش إنك بتتكلم عن مصر .. حسيت إنك بتكلم الجيران الصراحة أو أشقاءنا فى كفر الدوار!!

أشكرك يا ريس إنك عبرت عنى وعن أغلب المواطنين فى البلد .. كده انت ماشى فى الطريق السليم .. وبقيت صريح .. يعنى مش زى زمان: أيام ما رجعت فى كلامك فى كل حاجة سيادتك وعدت بيها وقولتها!!

يعيش الريس العياط متزعم المفلسين .. يعيش!!

لا تخرج قبل أن تقول سبحان الله!!

وشيَّر المقال ده وتأكد أنك لو ما شيرتهوش يبقى رجال النظام السابق منعوك، لأنهم (مش مرسي) المسئولين عن كل أخطاء الحكم فى فترة تولى مرسى الرئاسة!!

أصل رجالة النظام السابق أقوى وهما محبوسين عن وهما أحرار، لأن عندهم قوى خارقة!!

وتبقى مصر أولاً دولة مدنية