بولا وجيه يكتب: السنكسار يبكي
صفحات السنكسار بتدمع
مش عارفة منين البداية؟
ما أكيد دي مش قصة
أو حتى مجرد حكاية
القصة ابتدت من زمان
من أول دقلديانوس وشركاه
اتمتع بدم النصارى
هو وكل اللي معاه
بس لو ركزت بجد
هتلاقى أنه مش هو الفاعل
دي ليلة كبيرة
ومينفعش لوحده يكون الشايل
فيكي ايه يا اكلسيا
ومختارة من عنده
ليه مصرة توجعي
كل اللي فيه بيعاندوا
ليه مصرة تصمدي
لوحدك في وش الريح
ازاي بتباني عفية
وأنتي جواكي جريح
ما أنتيش مجرد أم
أو حتى مرسي
ازاي تليني وتحني
والزمان بيجرح ويقسى
ازاي شايفة أمل
والدنيا قدامك سودة
ازاي يكسروكي
وتبقى الناس عليكي مسنودة!
ردي عليا خلاص
مخي خلاص هيشت
مركبي هي اللي ضعفت
ولا الموج اللي شد؟
جايلك واثق عندك اجابة
وعندك كلام يتقال
يا مقدمة شهداء
شباب وستات وشيوخ وعيال
يا دنيا كبيرة
واسمها كنيسة
وصوتها دائمًا عالي
مهما تكوني حبيسة
يا منارة للعالم
ترشد كل اللي ضل
جايلك تطمنيني
وتقوليلي ايه الحل؟
