أول قصيدة عن الطفل يوسف ضحية «الطلقة الطائشة»
طرح الشاعر عمرو حسن، عبر صفحته الشخصية على موقع التواصل الاجتماعي «فيس بوك»، أول قصيدة ليوسف سامح «طفل الطلقة الطائشة»، والذي أصيب بطلقة في رأسه منذ يومين في منطقة أكتوبر، ودخل في حالة خطرة بالعناية المركزة.
وجاءت كلمات القصيدة كالتالي:
عاوز أقولك كلمة وأنا عارف
إنك بتسمع كل شيء متقال
فيه أرض كاملة بتدعي علشانك
شباب بنات ستات شيوخ وعيال
صبح الدعاء المستحب (يوسف يارب)
شي الله يايوسف يابن مروة ياحلو
ياجميل وقلبك لم ناس أكوام
إيه اللي بين ربك وبينك بس
علشان فـ خاصك يتوجعلك عام
فيه حاجة لسه مش فـ كتب الطب
إن الحواس زي البشر بتحب
وإن الدعا بيطب
وإلا يوسف كيف نجا م الجب؟
وإزاي رجع موسى لأمه بخير؟
وإزاي نجا م الحوت يونس سوى بدعاه
فيه ف الدعا شيء صعب ومستحيل نوعاه
فيه سر كامن فـ الدعا فادعو
ادعو ليوسف زي مادعيتوا وفهمتوا قلب الطفل ووعيتوا
ادعوله دعوة حب ساعة صلاة الفجر
قيدوا الشموع قناديل صلاة ويقين
وادعوله فـ الشارع
ادعوله وإنتوا فـ الطريق للشغل
سموا الشوارع كلها يوسف
وادعو بصدق عيال ولاد جيله
نفحة دعا تجيله
أوطان بتصحى لطفل لتدعيله
يارب يا واحد
لينا رجاء واحد
لينا طلب ممتد
فـ صلاتنا جمعة وحد
من حد أكبر شيخ ولحد أصغر حد
تنفح بكرمك فيه
وأمه ترجع بيه
مانشوفش أبدًا فيه ولا شر ولا مكروه
ادعوا ليوسف قوي
يا اللي إنتوا بتحبوه
