بهلول المشغول: شيخ الأزهر رمز لمصر.. وأبو حامد تلميذ في الفصل

كنت فاكرك عيل جامد
يامحمد يابن أبو حامد
أتاريك ناوى نية سودة
للأزهر ومشايخه ياجامد

أتارى عندك وقت فراغ
وجابولك قانون متصاغ
قالولك نفذ يا حمادة
قال يعنى عندك دماغ

قلت الأزهر دا إرهابى
وقدام إعلام متصابى
قعدت تصرح للإعلام
أنا هجمع توقيع أصحابى

وأصحابك باعوك يامان
وقانونك رفضوا البرلمان
واللى وّقّع سحب توقيعه
وبقيت بينهم نكتة كمان

وأخيرا اتحرق دمك
وعرفت أن الأزهر عمك
شيخ الأزهر رمز لمصر
يااللى عليه بتشمر كمك

روح شوفلك نومة يا أسطى
بس قبل النوم اتغطى
واحلم على قدك يا نائبنا
وبلاش للأزهر تتحدى