يا ريس الكل.. ليلتك فل!!

سيادة الرئيس وعمى وتاج راسى ..
عايز أقولك إنى فرحت بضحكتك النهارده.. وعايز أقولك إنى غلطان ومستعد أبوس الواو.. وكمان أبوس حاجة تانية لو تسمحلى يعنى... أنا بصراحة غلطت فى حقك.. والعيال بتوع كفاية وستة إبليس والبرادعى شرّبونى حاجة أصفرا ... وقالولى إنك سعادتك يعنى لمؤاخذه هتسيب الحكم شوية، وتروح اسم الله على مقامك تعمل "زى الناس" فى شرم الشيخ ...قمت أنا بعبط أهلى صدقت.. وطلعت أعمل مظاهرة تطالب لسعادة فخامتك إن ربنا يسهلهالك.. أتارى العيال ولاد العفاريت.. عملولى مغرز... قال إيه واتظاهروا ضد سعادتك.. يا باشا أنا محقوقلك.. ومستعد اتعاطى "الخيار الاستراتيجى" مع سيادتك.. وأبوس لمؤاخذة .."حمامة السلام" ..علشان أبو مازن مايزعلش .
حبيبى يا ريس ..هم ولاد الشياطين الإخوان كمان دبّسونى وقالولى إن سعادتك لمؤاخذة بتبيع الغاز لإسرائيل، ودهيتو كلام كبير، وقالولى إنك مزنّقها علينا، وعدم المؤاخذة مقشّطنا.. قوم أنا بهبلى اتحزقت كده وقمت قايل: "يسقط الفساد".. وبعد ما أخوك مرسى لما جه شفط الغاز والسولار وو"نشف زيت"، وكان قدمه اسم الله عليك "أرشل" وكعبه البعيد "مبروم" إنما انت ..هو فيه زيك انت يا ابو الأكرمين سى "عيلاء" وسى " جمال".
روحوا يا ولاد الأبالسه يا بتوع ميدان التحرير.. خلعت راسى ودعيت عليكم... يا وحشين ياللى بتعملوا حاجات قلة أدب فى الميدان.. وبتتمولوا من دول سيكو سيكو.. والأكادة كمان..عندكم أجندات خارجية.. زى الواد عكاشة.. اللى راح اشترى كتب خارجية.. قال إيه يذاكر فيها.. قمت أنا فقسته.. كتب خارجية وأجندات خارجية تساوى إيه بقى؟؟؟
تساوى.. "خياطة عظمى".. أيوة... الهدوم لازم ينكووا ولازم يتخيطوا... علشان نستقبلك واحنا متسنجفين.. الله يحظك يا ابو "عيلاء".
سيدى الباشا.. وحياة ستنا الشريفة العفيفة اللطيفة الرئيفة الكفيفة.. ستنا الست "أم عيلاء" سوزى هانم.. أنا تبت على إيد ولادك.. اوعى تزعل.. العب فى مناخيرك زى ما انت عايز، واضحك زى مانت عايز.. ما هو احنا بنفرح لما كنت بتلعب فينا 30 سنة .
عمى وتاج راسى.. كل من عندنا تمنى يهديك السلام ..
وأنا من صباحية ربنا هستناك عند القصر الجمهورى.. وهحضن كل العساكر واصرخ وأقول: "الجيش والرئيس والإخوان إيد واحدة"... "الجيش والرئيس والشاطر إيد واحدة".. "الجيش والرئيس وبديع إيد واحدة".
ملحوظة: سامحنى يا نوارة الرويسا.. المرة اللى فاتت جبتلك زيارة بلح أمهات.. أصلى خوفت.. لأن الواد عبشكور الدرمللى كان جايبلك قصب.. أيوة قصب.. علشان عرف إنك محتاج حاجة ترطب.. قوم اسم الله على مقامك الكريم ..ولادك بتوع- لمؤاخذة- أول ضربة جوية.. رحّبوا بيه قوى.. وخرج من عندهم وهو عنده البواسير ..
وختامًا ..
مبروك عليك البراءة يا ابو العلاء يا زين.
جاتلك من المغاوير أبو سليمان وحسين.
والنصرة راكبة الجمل وحمار معاه حصانين.
واحنا ولاد الركايب هنلاقى زيك فين؟؟