رسالة من "سامر محمود" صديق درب الفشارين ردًّا على بياننا الأخير!!
عقب نشر بياننا الأخير وصلتنا عدة رسائل وردود أفعال من خلال البريد الإلكترونى لدرب، الفشارين ومن خلال مواقع التواصل الاجتماعى "فيس بوك" و"تويتر"، وهذه هى الرسالة التى فازت بالنشر بعد أن اخترناها عشوائيًّا لننشرها، وكانت للصديق سامر محمود، والتى يقول فيها:
(المستشار مُحْرَج.. والشعب مكسوف.. وأنا كنت فى نص هدومى وهى مراتى بتقولى: شايف الريس مبارك أبو خمسة وثمانين سنة وشّه منور وشعره أسود مش انتا يا أبو ستة وتلاتين سنة ياللى الضغط مبهدلك ونص شعرك أبيض ...
ساعتها عرفت إن الراجل ده إحنا افترينا عليه.. عشان كده ربنا ابتلانا بالأمراض من عينة الكبد الوبائى والغسيل الكلوى والسرطان، غير الضغط والسكر، والذى منه، عشان إحنا معرفناش نحافظ على هدية السماء اللى نزلت على استاد باليرمو..
أقصد على أرض المحروسة.. وكانت غضبة القدر.. وسلط الله علينا سلاح الإحراج والكسوف والخجل، وتنزلت على مولانا "الصبغة"، فجعلت من شعره الأبيض الناصع سوادًا بهيمًا كما هو سواد عيشة أهل المحروسة قبل وبعد وأثناء الثورة، ولذلك فمن موقعى هذا أصرخ وأقول: أنا آسف يا "لاكتويل"، فصبغتك لا يضاهيها صبغة، ويجعله عامر يا فشارين يا وحشين!!
