كنباوى وكنباوية .. حلقة رقم (40) .. رعب الإخوان من لقاء بعثة صندوق النقد الدولى بجبهة الإنقاذ وحزب النور
"كنباوية" تضحك على غير عادتها و"كنباوى" مندهشا
لضحكاتها التى ترج جنبات الشقة رجا..
"كنباوى": إيه يا "كنباوية"
ماتضحكينا معاكى.
"كنباوية": وماله يا
"كنباوى" اضحكك أنا بضحك على خوف الإخوان ومكتب الإرشاد وأعضاء الجماعة
ومرسى من لقاء بعثة صندوق النقد الدولى لحزب النور السلفى وجبهة الإنقاذ وحمدين
صباحى والبرادعى وعمرو حمزاوى.
"كنباوى": طيب وهمه خايفين من إيه؟
"كنباوية": همه
مفهمين البعثة إن الحياة فى مصر بمبى ووردى علشان البعثة تطمن وتوافق على القرض
وطبعا همه خايفين من انتقام جبهة الإنقاذ منهم للعداء اللى بينهم إنهم يدوا صورة
وحشة عن وضع مصر للبعثة تقوم البعثة متخوفة من إعطاء مصر القرض اللى الإخوان
بانيين عليه أمل كبير علشان يحلوا بيه مشاكل مصر.
"كنباوى": طيب مامرسى لسه واخد من
ليبيا 2مليار دولار ومن قطر 3 مليار دولار همه دول مش كفاية؟
"كنباوية": ولايعملوا حاجة هم مصر أكبر
من كده بكتير.
"كنباوى": يعنى قرض صندوق النقد
الدولى مهم بالنسبة لهم.
"كنباوية": ده روحهم فيه.
"كنباوى": طيب والجبهة فكرك ممكن تقف
ضد مصلحة مصر علشان تنتقم من الإخوان؟
"كنباوية": الجبهة مش كده وأعضائها محترمين
مش أشرار بس همه حيقولوا للبعثة اللى يمليه عليه ضميرهم بدون غش ولاخداع ولانفاق أو
كدب.
"كنباوى": وده طبعا مايرضيش الإخوان؟
"كنباوية": طبعا الإخوان عاوزين
يخدعوا البعثة علشان توافق على القرض رغم عيوبه ومساوئه.
"كنباوى": هو القرض له عيوب يا "كنباوية"؟
"كنباوية": طبعا أهم عيوبه فرض ضرائب
على بعض السلع الحيوية والهامة زى البنزين والسولار يعنى ودى مصيبة كبيرة لأن
المعروف إن زيادة أسعار السولار بيترتب عليها زيادة أسعار كثير من السلع منها
الخبز والخضروات والفاكهة والمواصلات واللحوم والأسماك والطيور والدواجن وده لوحده
كفيل إنه يهيج الشعب على مرسى والإخوان وهمه مش ناقصين مظاهرات أو اعتصامات
واحتجاجات اللى فيهم مكفيهم.
"كنباوى": على قولك ده كل يوم خراب
جديد.
"كنباوية": ده غير إن فيه سلع قرار
الزياده بتاعها اتوافق عليه.
"كنباوى": زى إيه يا "كنباوية"؟
"كنباوية": زى الأسمنت
والحديد اللى حيترتب عليه زيادة أسعار الشقق والوحدات السكنية وكمان زيادة الإيجارات.
"كنباوى": واللى عايز يتجوز زى جوز
بنتك وبيدور على شقة سعرها مهاود وعلى قد اللى معاه يعمل إيه؟
"كنباوية": ربنا بقى يتولاه برحمته
البت بنتى باين عليها بختها قليل وفرحها كل مادى بيتأجل بسبب الغلا والأسعار اللى
بقت نار.
"كنباوى": الصابرين بخير يا "كنباوية"
الصابرين بخير.
"كنباوية": البت بتكبر ولسه قاعدة فى أرابيزنا.
"كنباوى": كل شىء بأوانه يا "كنباوية"
ماتعقديش الأمور اللى ليها فيه نصيب حتشوفه وكله مقدر ومكتوب.
"كنباوية": ونعم بالله يا "كنباوى"
أنت اللى بتصبرنى على الغلب اللى أنا فيه.
"كنباوى": بكرة تتعدل والإخوان يروحوا
فى داهية ونرتاح منهم.
"كنباوية": يسمع منك ربنا يا "كنباوى".
"كنباوى": أنا شامم ريحة حلوة انت
عاملة إيه؟
"كنباوية": عملالكم كسكسى وكنافة.
"كنباوى": إيه الرؤضا ده؟
"كنباوية": ماأنا طول عمرى راضية عنكم.
"كنباوى": وإحنا كمان دايما راضين عنك
ربنا مايحرمنا من بعض.
"كنباوية": يارب يا "كنباوى"
يارب.
"كنباوى": يلا قومى اغرفى لنا حاجتك
الحلوة.
"كنباوية": من عنيا يا "كنباوى"
من عنيا.
"كنباوى": تسلم عنيكى وإيديكى يا غالية.
