ثورة غضب النشطاء لزيادة سعر تذكرة المترو.. ندا: نعمل خزين تذاكر بقى.. وليد: هايبقى ليها سوق سوداء.. حسام: مواصلة الغلابة ماسبوهاش في حالها.. محمد: طب زودوا لنا المرتبات
![صورة ارشيفية](images/no.jpg)
حالة من الغضب انتابت نشطاء موقعي التواصل الاجتماعي "فيس بوك وتويتر" لزيادة أسعار المترو بنسبة 100%، ليصبح سعرها 2 جنيه بدلًا من جنيه واحد، وسيتم تطبيقها من غدٍ الجمعة، وفقًا لقرار وزير النقل.
ودشن النشطاء هاشتاج "تذكرة المترو" للتعبير عن غضبهم للزيادة من خلاله، مؤكدين أن تذكرة المترو هي تذكرة الغلابة وزيادتها استقطاع من أقوات المصريين بعد الزيادات التي شهدتها الأسعار والخدمات في مصر مؤخرًا.
خزين تذاكر
قال محمد على حمدون: "ارتفاع سعر تذاكر المترو من بكرة التذكرة بـ2 جنيه".
وأضافت ندا أحمد: " تذكرة المترو هتغلى من بكره إحنا نعمل خزين تذاكر بقي!!!".
وعلق صلاح: "الوزير ينفي امبارح رفع سعر تذاكر المترو وبرلمان عبعال يرفض برضه النهاردة.. الوزير رفع سعر التذكرة".
ورد وليد عبد الله: "تذاكر المترو هايبقى ليها سوق سودة".
وتابع خيرت: "البرلمان أعطى الضوء الأخضر للحكومة برفع أسعار تذاكر المترو، عشان ميعيشوش في دور إحنا مع المواطن البسيط. السعر الجديد ٢جنيه".
مصلحة الحكومة
وقال بلال رمضان: "وبينما نحن نلهو وغيرنا يصنع المجد في واحد رفع ثمن تذكرة المترو".
وأضاف أشرف عبده: "للأسف كل ما يأتي لصالح الحكومة يطبق سريعًا أما ما في صالح المواطن يتم تجاهله ولكن الإشكالية هنا هل ستظل أسعار وسائل النقل الأخرى كما هي أم سيسعى الأخوة الأفاضل سائقو الميكروباص والتاكسيات وشركات النقل الجماعي والنقل العام إلى رفع قيمة الأجرة الخاصة بهم وكيف يتحمل المواطن تلك الزيادة دون زيادة بالمرتبات في حين أن هناك العديد من السلع سيسعى أصحابها لزيادة ثمنها لرفع قيمة النقل الخاصة بها".
وعلق حسام عماد: "حتى مواصلة الغلابة ماسبوهاش في حالها.. ابتداء من غد سعر تذكرة المترو 2 جنيه، يعني هاخدها كعابي بقي".
ورد جمال جيمي: "تذكرة المترو بقت بـ 2 جنيه.. زيادة 100 % على تمن التذكرة.. ربنا يكون في عون الناس اللى بيحسبوها بالقرش مش بالجنيه".
وتابع حسام بيومي: "أنا رايح أجيب ٢٠٠٠ تذكرة النهارده وابيعهم بكرة بجنيه ونص. مشروع مربح".
فاتورة الإصلاح
وقال أحمد صابر: "مفيش حد هيحاسب على فاتورة الإصلاح في البلد دى غير الغلابة بس الناس اللى أصلا بتروح للمترو مش عشان أي حاجة غير انها توفر جنيه أو اتنين عشان عيالهم.. ارحم ترحم... حسبنا الله ونعم الوكيل وكفى".
وأضاف محمد سعيد: "طب زودوا لنا المرتبات أو قللوا لنا الأسعار ما تتقوا ربنا في الشعب.. أقسم بالله احنا غلطانين إننا نزلنا انتخبناكم.. ما تبطلوا استفزاز بقى الشعب على تكة وينفجر".
وعلقت ماري يوسف رزق: "ياريت تكون الزيادة صغيرة زي باقي الدول يعني مثلا تبقي بجنيه ونصف وكفاياكم جمع فلوس الشعب والكهرباء بقت أربع أضعاف الأول لأن الشركة زوت 300 %
ومش ٣٠٪ زي ما الحكومة طلبت أرجوكم اتركوا الفكة اللي الناس ممشية نفسها بيها".
ورد أحمد سمير: "أسهل حاجة عندكم ترفعوا الأسعار بدل ما تفكروا تشغلوا مخكم وتفكروا إزاى تعظموا موارده".
وتابع محسن حافظ: "يعني الزيادة عشوائية هو شاف كل وزير بيزود قالك أنا كمان أعمل زيهم".