كنباوى وكنباوية.. حلقة رقم (38) .. مليارات ليبيا وقطر وفرحة الإخوان

كنباوى يستعجل كنباوية على اعداد الطعام لشعوره بالجوع وتأخرها اليوم فى إعداده على غير عادتها : ايه ياكنباوية ؟ ايه حكايتك النهاردة ؟ هو احنا مش حناكل ؟ ولا انتى ناوية تقلبى الغدا عشا علشان توفرى طقة ؟
كنباوية: ياكنباوى اصبر انا بعمل كرشه وممبار يعنى دوشه ودوخه والبوتجاز القديم ده مش مساعد بس نعمل ايه الشاطره تغزل برجل حمار
كنباوى: كان لزومه إيه الممبار النهارده ؟ كان كفايه الكرشه
كنباوية: العيال بيحبوا الممبار وانت بتحب الكرشه وانا لازم ارضيكم انتوا كلكم اعمل ايه بحبكم
كنباوى: واحنا كمان بنحبك بس اكلينا ابوس ايديكى
كنباوية: حاضر ياكنباوى نص ساعة والاكل يكون جاهز
كنباوى: ايه آخر الاخبار ؟
كنباوية: ليبيا وافقت انها تدى لمصر 2 مليار دولار قرض دون فوائد جدعنة منها وقطر كمان وافقت انها تدى لمصر قرض 3 مليارات دولار كوديعة اوسندات
كنباوى: والله ولاد حلال البلاد لبعضيها برضه
كنباوية: الإخوان فرحانين وخاصه مرسى وقنديل حيقدروا يشموا نفسهم شويه من ازمه السولار والغلا اللى فى البلد
كنباوى: عقبال قرض صندوق النقد الدولى
كنباوية: ده لسه معصلج حبتين والصندوق بيتشرط على مصر ومرسى خايف يزود الأسعار والضرائب الشعب يقوم عليه
كنباوى: ماهو غلا الحديد والاسمنت والاتصالات والسجاير ناقص ايه تانى يغليه ؟
كنباوية: طبعا حضرتك زعلان علشان السجاير غليت ؟
كنباوى: لا زعلان ولا حاجه هى يعنى جات على السجاير ماكل حاجه غليت واحنا بنشتريها ورجلنا فوق رقبتنا حنعمل ايه يعنى ؟
كنباوية: بكره تتعدل ياكنباوى والصبر جميل والحمد لله على الستر
كنباوى: نحمده ونشكر فضله
كنباوية: روح احلق دقنك وصحى العيال عقبال ما الاكل يجهز
كنباوى: حاضر ياكنباويه بس انتى عوزانى احلق دقنى ليه ؟
كنباوية: خطيب بنتك جاى يتغده عندنا النهاردة مش معقول ييجى يشوف دقنك طالعة كده
كنباوى: عندك حق احلق دقنى
كنباوية: وانا خلاص أهه قربت أخلص الأكل حتاكلوا صوابعكم وراه
كنباوى: اكيد ياكنباويه هو احنا حنتوه عن أكلك ده أكلك زى السكر حلاوته من حلاوتك
كنباوية: ماشى يامجاملنى يارافع من معنوياتى
كنباوى: ربنا مايحرمنا منك يامريحانا ومشبعانا
كنباوية: ولا يحرمنا منك ياساترنا ومكفينا
كنباوى : انا حصحى العيال وححلق دقنى وانتى شدى حيلك
كنباوية: الشدة على الله