طالبة بصيدلة الإسكندرية تكشف إهمال الأطباء لمصابي حادث نويبع
كشفت إحدى طالبات كلية الصيدلة وهى من زملاء طلاب حادث نوبيع بجامعة الإسكندرية مدى إهمال المسئولين تجاه المصابين جراء الحادث الأليم بمستشفى الطلبة التابعة للجامعة.
فتروى قائلة: "أنا طالبة في الدفعة اللي عملت الحادثة في نويبع من صيدلة إسكندرية، بعد الحادثة راح لهم رئيس الجامعة وكان عاوز يرجعهم بري وهما متكسرين ومتدغدغين ومنهم عنده شبهة ارتجاج في طريق 12 ساعة، سافروا لهم ناس مننا وضغطوا علشان يرجعوا طيران فرجعوا في طيارة عسكرية وبالواسطة وبالقرايب وبالمحايلة ما فرقوش بين الطالب والمرافق علشان كانوا عاوزين يخلوا الطلبة في مستشفى للطلبة وأخواتهم وقرايبهم المرافقين في مستشفى عام تانية".
وتابعت الطالبة قائلة: "وصلوا مستشفى سموحة الجامعي في حضور قائد المنطقة الشمالية والمحافظ وكان فيه دكاترة وفيه كاميرات للقنوات الفضائية، فقاموا بفك الجبائر اللي جايين بيهم على أساس إنهم هيتجبسوا، وأول ما مشيوا المسئولين ومعاهم الكاميرات الدكاترة مشيوا هما كمان ومافضلش في المستشفي غير دكاترة الامتياز والعيال متكسرة وقعدوا لحد الصبح من غير جبس".
وأوضحت قائلة: "المستشفى مهجورة ومش مجهزة، زميلنا اسمه معاذ حمدي رجله كانت مفتوحة وبتنزف ساعتين مافيش خيط يخيطوه ولا فيه إبر خياطة مضي تعهد وخرج على مسئوليته الشخصية، وبنت تانية اسمها غادة إسماعيل عندها كسر في الوجه وكسر في العصعص كانت بتصرخ من الالم ساعتين متواصلين، محدش اداها مسكن محدش دخل لها اصلا، قعدوا زمايلنا يدوروا على حد لاقوا دكتور امتياز قالوا له يجيب لها مورفين قالهم مافيش مورفين، قالولوا دي هتموت من الوجع قالهم محدش بيموت من الوجع، ومسكوا فيه وكانوا هيضربوه جابوا لهم الأمن البنت أهلها خرجوها برضه بتعهد وودوها مستشفى خاصة وهي بتصرخ".
وأضافت قائلة: "إنهم قاموا بالاتصال بعميدة الكلية ليلًا فقالت لهم "الصباح رباح، وفضلوا طول الليل بيصرخوا".
وكان طريق "شرم الشيخ – نويبع"، قد شهد يوم الجمعة، حادثا بشعا، حيث انقلب أتوبيس تابع لإحدى شركات السياحة يقل عشرات الطلاب، من جامعة الإسكندرية كانوا في طريقهم إلى منطقة "رأس شيطان" في رحلة نظموها خلال إجازة نصف العام.
