رئيس التحرير
عصام كامل

دعوة المظلوم.. قصيدة لـ«نصر اللوزي»


يا معاشى يا مزعلنى كل مسا وصباح
يا مبدل نور أفراحى بكل آلام وجراح
نفسى أبات ليلة واحدة وقلبى مرتاح
علشان أسكت حزنى اللفت بقى تفاح

يوم عشرة من كل شهر الجيب نواح
بقيت كل شهر عايش بالأوهام سواح
خليتنى في عز النهار شايل المصباح
***
اللهم اجعله خير آل إيه أنا عند جزار
قلتله هاتلى الموزة قاللى بلاش هزار
وروح يا متعوس ركب للجلابية زرار
أنت آخرك حتة جبنة وربع كيلو خيار
من العيد للعيد تفرح بنص كيلو منبار
خلاص يا معلم اسكت الجيوب أسرار
قلت لنفسى صبرا دا الليل أخرته نهار
***
يا معاشى أنا عايز أعيش زى الناس
فين ميزان العدل والوزن بالقسطاس
ياما سمعنا بمنكوبى الدخل لا مساس
لحمة سمك فراخ خضار علينا امواس
علاج أمراض مزمنة قلب وبنكرياس
وضغط عالى في المخ بيضربنا بفاس
أمراض بالألم دايمة والأسعار هراس
***
حتى العدس اللى كان بيدفى السقعان
سعره اتهبل بقيت بردان من التوهان
آه لو كنت أملك لساعة خاتم سليمان
لقلت للمارد أنا من كل مسئول زعلان
أبوس إيديك هاتلى دوا لمعاش تعبان
اشترى به دوا وأكمل الشهر بادنجان
والله أسعار الدوا كارثة بتعذب الغلبان
***
يا حكومة اتقى الله جاى يوم الحساب
فواتير المية والنور بقت علينا عذاب
الحرمان بقينا معاه حبايب وأصحاب
وناس بتستورد أكل قططهم والكلاب
تانى هقول فين العدل يا أولى الألباب
ربنا كرم بنى آدم أنتم منه في غياب
دعوة المظلوم للحق ليس لها حجاب
Advertisements
الجريدة الرسمية