النشطاء يحتفلون بافتتاح مشروع الاستزراع السمكي.. ميدو: خيرنا طلع للنور.. الجنتل: هنأكل العالم كله سمك.. محمد: لسه اللي جاي أحلى.. عواد: ننتظر شائعات الإخوان.. ونهى ساخرة: فين مزارع الجمبري

احتفل نشطاء موقعي التواصل الاجتماعي «فيس بوك» و«تويتر» بافتتاح مشروع الاستزارع السمكي بالإسماعيلية، على هاشتاج «الاستزراع السمكي»، الذي تصدر تراند مصر على تويتر، فور افتتاح الرئيس عبدالفتاح السيسي للمشروع، اليوم الأربعاء.

بعض رواد التواصل الاجتماعي أكدوا أن تلك المزارع ستقلل الفجوة بين الإنتاج والاستهلاك ويسد العجز، في حين سخر آخرون من الإخوان قائلين: إنهم سيطلقون الشائعات، وسيرسلون أسماك القرش لتأكل سمك المزارع.

مفيد لمصر
قال محمد السيد إن: «مشروع الاستزراع السمكي ده مفيد جدا لمصر حيساعد على تقليل الفجوة بين الإنتاج والاستهلاك وحيسد العجز الموجود اللي هو ٧٠٠ ألف طن، يعني مشروع كويس أيوه الأسعار نار بس مافيش مشكلة نصبر ونستحمل الغلاء الفاحش اللي إحنا فيه ٦ شهور بس».

وأضافت أنا دودو: «أيد بتخلق من قلب ضيقها نجاح.. الاستزراع السمكي»، وذكرت سلمى خان: «الاستزراع السمكي ماشاء الله... اللهم احفظ مصر ووفق أهلها للخير واجمعهم على قلب رجل واحد يارب»، وردت نينا زكي: «بورسعيد اليوم في عيد.. الاستزراع السمكي.. أطفال بورسعيد الباسله ومستقبل مصر الزاهر وابتسامة مصر القادمة يحيوا رئيسهم»، وتابع الشاكي: «مبروك للمصريين مشروع الاستزراع السمكي والخرفان لأ».

إشاعات الإخوان
بينما ذكر هاني حمدي: «مستني اسمع الإشاعات اللي هيطلعها الإخوان على مشروع الاستزراع السمكي، ها هتقولوا إيه السمك مسموم ولا الكيلو منه بألف جنيه ولا ده سمك صيني ولا إيه؟؟ اهروا يلا أنا في الانتظار».

وكتب الجنتل: «صباحكم سمك بإذن الله الرئيس السيسي يفتتح مشروع الاستزراع السمكي بالإسماعيلية هنأكل دول العالم كلها سمك والله»، وعلق عبد العزيز البيك: «يعنى المفروض الفترة الجاية نلاقي السمك رخص».

ورد محمد راجح بقوله: «الاستزراع السمكي.. يعني السماك اللي بشتري منه هيرجع يبيع البلطي بـ 9 جنيه.. ياريت»، وتابع أشعار محمد عثمان «الثروة السمكية مهملة في الدول العربية».

بنزرع سمك
أما أحمد جودة، فأشاد بالمشروع، قائلًا: «إحنا بعون الله بنزرع سمك»، وأضاف ميدو السيسي: «خيرنا طلع للنور يا مصريين ولسة اللى جاى أحلى بس محتاجين شوية صبر وتماسك ورجالنا الأبطال شغالين من نار من أجل الاستقرار وعودة الاقتصاد وعودة الإنتاج».

وذكر وليد فرج النجار: «افتتاح أول بشاير الخير لمصر.. الاستزراع السمكي»، ورد نادر قناوي: «اللهم اجعل مصر بلد خير وأمان.. الاستزراع السمكي»، وتابعت نانسي يوسف: «أتمنى أسعار السمك تبقي معقولة لأن الجمبري بعد ما فرحنا بية لقيناه نزل بـ ١٤٠ ج للكيلو».

سمك بالفريك
قالت مودة البرهامي: «إحنا ملوك السمك»، وأردف محمد حسين ساخرًا: «بحب السمك بالفريك.. عاوزين مزرعتين فريك جنب مزارع السمك».

عاش الرجال
وعلق أحمد عماد قاون: «اللهم صلي على النبي عاش رجالة مصر.. عقبال الانتهاء من مزارع المليون رأس ماشية ومائة ألف صوبة زراعية»، ورد محمد العربي: «بقا عندنا مزارع سمك واو... وبنستورد السمك الصغير من بره بس هنرجعووو كبير قوى»، وتابع نهي كمال: «مش بحب السمك أنا.. فين يا ريس مزارع الجمبري».

وتابع محمد عواد: «على فكرة الإخوان ممكن يبعتوا يجيبوا سمك قرش ويحطوه في مزارع السمك».