الغضب يجتاح مواقع التواصل الاجتماعي لإعفاء الدواجن المستوردة من الجمارك.. صلاح: يذبح الصناعة الوطنية.. النشار: مصالح حيتان كبيرة.. محمود: يدعم البرازيل على حساب مصر
حالة من الغضب والحزن الشديدين اجتاحت مواقع التواصل الاجتماعي "فيس بوك وتويتر" بسبب قرار رئيس الوزراء بإعفاء الدواجن المجمدة المستوردة من الجمارك، ليؤكد رواد مواقع التواصل الاجتماعي رفضهم للقرار، وأن القرار يقضي على صناعة الدواجن الوطنية، ويضر بصحة المواطن المصري "الغلبان"، متسائلين عن صاحب المصلحة الحقيقية وراء تطبيق ذلك القرار بأثر رجعي.
ذبح الصناعة
قال الدكتور صلاح عبد المعبود: "سؤال بريء: إعفاء الدواجن المجمدة المستوردة من الضرائب، ألا يؤدي إلى ذبح صناعة الدواجن الوطنية؟!".
وأضاف محمد الشريف: "قرار إعفاء الدواجن المستوردة من الجمارك غير مسبوق. منذ متى تعفى سلعة من الجمارك بأثر رجعى؟ لصالح من يسرى القرار اعتبارا من 10 نوفمبر الجاري؟".
وعلق محمد فتحي: "منتظرين نعرف مين الجهات/ الشركات اللي هتستورد الدواجن المجمدة وهتاخد إعفاء من الضرايب الجمركية.. عشان نعرف السبوبة لمين بالظبط..!".
اكتشاف متأخر
وردت مصرية أوي: "إعفاء الدواجن المستوردة فكرنى بطوابير الجمعية علشان نجيب فرخة مستوردة... وفى الآخر اكتشفنا أنهم كانوا بيأكلونا فراخ فاسدة...".
وتابع أحمد رأفت: "بعد قرار إعفاء الجمارك عن الدواجن المستوردة.. إوعوا تاكلوا فراخ القرار دا وراه مصيبة وبكره أفكركم".
مصالح
وقالت نمنج سعيد فهمي: "إذا كانت الفراخ المجمدة بعد دفع الجمارك تباع بـ20 جنيها للكيلو والفراخ الحية في مصر تباع بـ 28 جنيها للكيلو بدون جمارك.. إذن فلتذهب الفراخ الحية في ستين داهية.. أو جشع التجار يقل شوية علشان مزارع الدواجن تقدر تستمر في السوق.. نصيحة للتجار الجشعين والطامعين قللوا من مكاسبكم وإﻻ".
ظاهره الرحمة وباطنه العذاب
وأضاف محمد النشار: "أين أعضاء لجنة الزراعة بمجلس النواب من قرار شريف إسماعيل رئيس وزراء مصر.. وفيهم أطباء بيطريون ومهندسون زراعيون.. أين نقابة الأطباء البيطريين أين نقابة الزراعيين.. قرار إعفاء الدواجن المستوردة من الجمارك ظاهره في تخفيض أسعار الدواجن للمستهلك وباطنه مصالح حيتان كبيرة".
وقال محمد مختار: "طبعا فرحة مستوردي الفراخ المجمدة لا توصف.. هاتبقى أحلى مصلحة عملوها في حياتهم.. هانجيب فراخ من بره.. مش عارفين هي إيه.. سليمة ولا مريضة.. مدبوحة حسب الشريعة ولا لأ.. ونعبيها في أكياس ونجمدها ونصرف عليها شاي بالياسمين عشان الموافقات والإفراجات الجمركية مش مهم نصرف براحتنا.. ما إحنا اتشال من علينا الجمارك ومعانا مساحة حلوة للمكسب.. ومفيش تسعيرة... هاتمسكنا عشان تحدد المكسب أو سعر البيع النهائي.. ومش مهم بقى لما الفراخ دي تترمي في المينا شوية وتفك من التلج شوية.. وتتجمد تاني.. والمعدة بتاعتنا تفرم الزلط.. ونيجي بقى للي أخطر من كده.. إن عندنا صناعة اسمها صناعة الدواجن..آه والله.. متطلبات الصناعة دي.. أيدي عاملة..موجودة والحمد لله.. والأعلاف..غالية نااااار.. لأن مكوناتها وإضافاتها مستوردة ومرتبطة بسعر الدولار... الأدوية والتحصينات أسعارها زادت بما لا يقل عن 40%.. سواء كان مستورد أو محلي..لأن الخامات برضو مستوردة.. المربيون وأصحاب المزارع اتخربت بيوتهم.. وأصبحوا أصحاب ديون وليس أصحاب أموال.. واللي بيبيع مزرعته مابيدخلش دورة جديدة..طيب ليه؟؟ لأن سعر بيع الفراخ أقل بكتير من التكلفة اللي بتتضمن علف غالي وأدوية وتحصينات غالية جدا ونوافق".
دعم عمال البرازيل
وقال حسن عبد المقصود: "كدا تربية الدواجن المحلية تعيش أنت".
وأضاف محمود حسن: "إنا لله وإنا إليه راجعون.. توفت أمس صناعة الدواجن إثر إصدار رئيس الوزراء قرار بإعفاء الدواجن المستوردة من الخارج من الرسوم الجمركية بدلا من إعفاء مستلزمات الصناعة المصرية وبذلك القرار يدعم رئيس الوزراء العمالة البرازيلية بدلا من تدعيم العمال المصرية".
وتابع عبد الغفار خفاجة: "ياريت تقولولنا مين الجميل الأمور اللي دخل جديد في استيراد الدواجن واللا الموجوين سمعوا الكلام ؟ هو إنتم بتفكروا في الفقراء ؟ دا إنتم لو بتفكروا فيهم فعلا يبقى التفكير بتاعكم إزاى تطحنوهم أكتر".
