الداخلية ترصد انتفاضة الفخذة الضاني
بخطوات ثقيلة، وجسد منهك، وعَيْنَيْن يطل منهما رعب من مجهول، اقتربت بهدوء من صديقي الجالس بركننا المعتاد داخل المقهى.. بادرني منزعجا بالسؤال: ياساتر يارب مالك ياصابر؟! قلت: مشكلة رهيبة رهيبة.. قال لي احكي بسرعة.. بدأت أحكي:
باختصار.. لقيت نفسي واقفا أمام رئيس المباحث والدماء تلطخ وجهي وملابسي، ومن خلفي وقف مخبر قوي البنيان وبيده شاكوشا كبيرا وقد غطته الدماء.. سألني الضابط إيه اللي حصل.. قلت:
اللي حصل حصل ياباشا كل الناس شافته ومفش داعي أكرره.
قال: ماليش دعوة بالناس، أنا عايز أسمع منك إيه اللي حصل؟
=ضربته ياباشا.
ــ ليه؟
= قليل الأدب.
ــ حتى لو قَل أدبه.. تعمل فيه كده ياصابر؟
= ماهو مش أي قلة أدب ياباشا.
ــ يعني عمل لَك إيه وللا قال لك إيه بالظبط؟
= قاعدين على باب ورشة الأسطى عرفة الحداد زي كل يوم، كنا بنتكلم في الحالة والأسعار والعيشة الضنك والمصاريف والدروس والفول والطعمية والبصارة والبتنجان اللي نشِّفوا دمنا.. وبعدين الكافر السافل عمل حاجة مستحيل حد يتحملها.
ــ يعني قال ألفاظ قذرة؟
= لأ.
ــ لامؤاخذة غلط في حريم تخُصَّك؟
= لأ.
ــ قلع عريان في الشارع؟
= لأ.
ــ شتمك؟
= لأ.
ــ يبقى أكيد سب الدين؟
= لأ.
ــ اتكلم ياصابر.. جننتني.. قول عمل إيه عشان تكسر دماغه بالشاكوش؟!
= جَهَر بالمعصية ياباشا.. جَهَر بالمعصية.
ــ يعني عمل إيه اتكلم؟
= قلنا نشرب شاي.. الأسطى عرفة صب لنا الشاي، لقيته بيقول مش هشرب شاي، أنا هاشرب حاجة ساقعة.
ــ تقوم تخبطه بالمرزَبَّة؟!
= ياباشا مش هو دا السبب.
ــ أمَّال إيه السبب قول؟
= الأسطى عرفة قال له مش عوايدك.. ليه هاتشرب حاجة ساقعة الليلة؟ رد وقال أصلي متغدي "فخدة ضاني".
ــ وبعدين؟
= ماحسيتش بحاجة.. لقطت المرزَبَّة من جوه الورشة ونزلت بيها على دماغه.
*هنا توقف صابر عن الاسترسال فسأله صاحبه: كمِّل.. وبعدين؟
= قال صابر: في اللحظة دي ياصاحبي، دخل عامل الديليفري، وحَط على مكتب الظابط تشكيلة مشويات كباب على نيفة على ريَش على موزة بخلاف السلاطات.
سأله صاحبه: وبعدين؟
= قال: فِضِلْت ابُص للأكل، وماحسيتش إلا وأنا باخطف المرزبَّة من إيد المخبر، ورُحت رافعها لفوق وانا باهتِف بعلو حِسَّي الله أكبر.. وهوووووب.
سأله صاحبه بشغف: ها.. قول عملت إيه؟
= ولا حاجة.. صحيت من النوم.
ــ صاحبه: صحيت ليه في التوقيت المثير ده؟!
= ياعم مش عايز مشكلات مع الداخلية.
