بتعرف تتكلم ياباني؟

لو فكرت في يوم تتعلم ياباني.. لازم يكون عندك فوق الصبر، صبر تاني.. اللغة اليابانية مش أبجدية واحدة، ده أبجديتين "هيراجانا وكاتاكانا" كل واحدة ١١٣ حرفا مختلفا.. وضيف عليهم عددا كبيرا جدا من رموز الـ"كانچي".. اليابانيون بيدرسوا نحو ٢٥٠٠ رمز كانچي، وعشان تعرف تقرأ الياباني كمغترب في اليابان يفضل تكون عارف نحو من ٢٥٠-٥٠٠ رمز كانچي بنُطقه المختلف على حسب الكلمة وده بخلاف القواعد النحوية.. طبعا موضوع محتاج لمجهود كبير ومستمر مش بس في قراية الرموز، ده كتابتها كمان قصة تانية.. بس كل ده ما يقدرش يمنعك أنك تتكلم ياباني.. يكفي انك تندمج في السيستم الياباني عشان تلاقي نفسك جزء من سيمفونية "دِقَّه" فريدة جدا من نوعها.

أحب أنقل تجربة مريت بيها على مدى أربعة شهور.. كان ليا الحظ إني اشترك في "مقطوعة يابانية" ظاهرها يبان عادي بس مضمونها وطريقة عزفها غير عادية بالمرة.. طلبوا مني في جامعتي- جامعة كيوتو للدراسات الدوائية- أن أحضر كورس تنمية مهارات اللغة الإنجليزية لطلبة الدكتوراه كجزء من الساعات المتعددة المطلوبة منهم، تشجيعا إنهم يتكلموا إنجليزي.. مترددتش أبدا إني أساعد خصوصا لما عاشرتهم وعرفت قد إيه اليابانيين خجولين جدا وبيواجهوا تردد وخوف إنهم يتكلموا لغة تانية..

"كلكم هتسافروا وتقدموا محاضرة أو بوستر عن أبحاثكم.. يهمنا أوي أنكم تظهروا بالمظهر المناسب لليابان".. ده اللي قاله منسق الكورس حرفيا في أول اجتماع بينا.. ولما فهمت الغرض منه، أستأذنتهم إني اشترك بدل ما أكون مجرد حاضرة..

كل طالب مننا حدد يوم يعرض فيه مشروع بحثه قدام زمايله والأساتذة المشرفين... كلنا بنسأل وبنتناقش في طريقة الإلقاء، سرعة وأسلوب العرض والمحتوى العلمي بكل الاحترام..

‎بعد نحو شهرين من التدريب والتعديل، انتدبوا أستاذا أجنبيا متخصصا في"اللغويات" لمدة أربعة أيام.

عرضنا اأحاثنا. قيِّمنا كلنا وحدد نقاط الضعف والقوة لكل شخص.. إزاي يبقي شغلك معقد جدا لكن تقدر تشرحه وتوصله لكل التخصصات بمنتهي السهولة بكلمات بسيطة جدا ولغة إنجليزية سليمة وواضحة... إزاي متخليش اللكنة اليابانية- أو أي لكنة تانية- تمنعك إنك تنطق إنجليزي صح ويكون واضح ومفهوم جدا للمستمعين..

درَّبنا الدكتور كويس قوي على "تون" الصوت، الهيئة والنفسية اللي لازم تقدم بيها.. إزاي تستقبل وترد على الأسئلة وتتصرف في المواقف المحرجة.. تشجيع وتدريب مستمر. إجابات وافية وشافية لأي استفسار مننا وكل واحد فينا كان ليه أسلوبه الخاص اللي محاولش البروفيسور يغيره.

أسلوبه المحترم خلاني مبسوطه ومش متوتره وأنا بسمع نقده حتى لنفسي. الجميل أن مفيش حد اتضايق، كلنا كنا مركزين في كل كلمه بيقولها وبالعكس كمان بنستني أي غلطة نعملها عشان نعرف رأيه، لأن الهدف هو إنك تكون واجهة مشرِّفة لبلدك وجامعتك وعندك ثقة تامة في نفسك وفي شغلك لما تسافر كياباني تعرض أبحاثك في أي مؤتمر دولي.

كلنا بلا استثناء خلصنا الكورس أفضل بمراحل واكتسبنا منه خبرة عملية هايلة.. واللي أكدهالي هو فرق مستوانا قبل وبعد.. ثقة بالنفس وأداء رائع.. واستكمالا للنغم الراقي ده كان لازم يتعزف قدام الكل عشان يبان اكتر.. بعدها بنحو شهر نظمت الجامعة مؤتمر داخلي بحضور كل أساتذة الكلية مخصوص عشان "يعيِّشونا الجو".. تقدم البحث وتتسأل وتجاوب قدام عدد كبير من العلماء من تخصصات مختلفة في قاعة كبيرة.. ومش مسموح استخدام أي لغة غير اللغة الإنجليزية..

يوميها كان اللحن الأخير اللي دايما بيسيب فيك أكبر أثر.. يوميها عرفت ليه اليابانيين مميزين جدا في كل حاجة بيعملوها.. عرفت يعني إيه اهتمام بالتفاصيل وخصوصا المعنوية.. هدف الكورس الأساسي هو التشجيع وكسر حاجز الخوف والرهبة من مواجهة ناس في بلاد تانية بيتكلموا لغة تانية..

من بعدها مابقتش قلقانة من صعوبة اللغة اليابانية.. يكفيني إني أتعلم منهم إزاي أهتم بكل التفاصيل وأنفذها بحرفية زي ما بيعملوا.. ساعتها هكون أكيد "بتكلم ياباني".