بالصور.. ردود أفعال متباينة على «تحب مراتك تشتغل بعد الجواز؟».. رفعت: «مش هخلي ليها اختلاط بحد».. صدام: «صاحب بالين كداب».. أم ريتاج: «لو مشتغلتش البيت مايمشيش»
نشرت صفحة «برايد جروب» سؤالا على متابعى الصفحة عبر «فيس بوك»، حول هل يفضل الرجل أن تعمل زوجته أم لا، مما أثار جدلا بين الشباب والفتيات، وجاءت آرائهم كالتالي:
- شغلها ستر ليها
قال محمد: «شغلها ستر ليها بغض النظر عن أي حاجة، أنا ليا وجهة نظر أن الست لو ليها شغل تشتغل عشان الراجل مش عايشلها طول العمر وإحنا مش موظفين ولا لنا معاش يعني هي تبقى معاها أي شيء تاكل منه عيش ماتتبهدلش لو الراجل جراله حاجة».
- لو مش هتقدر شغلها الأصلى أولى بيها
وأضاف محمود: «لو دا مش هيتعارض مع البيت أوكي مفيش مانع دا اختيارها.. البيت شغل بردو لو هي هتقدر على الشغلتين تمام جدا، مش هتقدر يبقي شغلها الأصلي أولى بيها».
وقال سيد: «لا مشغلش مراتى ولا أختى ولا أمي».
- مش هخلي ليها اختلاط بحد أصلا
وأضاف رفعت: «لا طبعا مش هتشتغل لأن أنا مش هخلي ليها اختلاط بحد أصلا».
- لو مشتغلتش البيت ما يمشيش
وقالت أم ريتاج: «الفترة دى الست لو مشتغلتش البيت ما يمشيش أصلا»، وأضافت بسمة: «دايما بشوف أن السؤال دا مش قرار للراجل.. تشتغل تقعد براحتها».
- صاحب بالين كداب
وقال القائد صدام: «لا علشان صاحب بالين كداب وطالما الراجل مركزه المالي كويس ومكفي بيته ومصاريف مراته يبقي ما فيش داعي لشغلها، وتركز في البيت وتربية العيال والمواعين».
- كيان ليها واستقلال
وأضافت هند: «أنا لو حد قالي سيبي شغلك.. برفض طبعا، الشغل كيان للمرأة واستقلال علشان مش تحتاج لحد في أسوأ الظروف».
وتابع أحمد: «عادى مفيش مشكلة بس لو الشغل هايبقي ليه تأثير على البيت يبقى لا».
