شاهِد بعينك.. وارحَم بقلبك.. وامسك لسانك!!
المنظر: شارع بوسط البلد.. سيد وصديقه مصطفى-الثلاثينيات من العمر- يتسكعان بلا هدف.. تقترب منهما سيارة ميكروباص مرسوم عليها تليفزيون.
مصطفى: دي شكلها عربية تليفزيون؟
(سيد يدَوَّر الجري مبتعدا عن المكان)
مصطفى "بدهشة": بتجري ليه يا سيد؟!
سيد: عربية الجزيرة.. اجري يا مصطفى.
مصطفى "ضاحكا": ارجع ياله دا تليفزيون مصري.
سيد "عائدًا يلهث": الحمد لله.. كنا هانلبس قضية تخابر.
يغادر عربة التليفزيون رجل بيده لافتة مكتوب عليها "مسابقة سوبر دونْكِي".. المذيعة وطاقم التصوير يقتربون من سيد ومصطفى، والناس يتدافعون نحوهم.
المذيعة: مشاهدينا الكرام أهلا بكم من الشارع المصري، في أولى حلقات مسابقة "سوبر دونكي"، لسعداء الحظ أصحاب الذكاء الناري.
سيد "هامسا لمصطفى": مش دونكي يعني حمار برضه؟
مصطفى: هششش.. مالناش دعوة.. التليفزيون لو قال دونكي يعني أسد، خلاص يبقى أسد.. انت لسه مافهمتش يا سيد؟!
المذيعة تقترب من سيد: ومع أول متسابق.. نتعرف عليك؟
سيد: اسمي سيد.
المذيعة: لازم اسمك الرباعي لأن لو أسعدك الحظ هاتكسب مليون جنيه.
يسقط سيد مغشيا عليه، ويحاولون إفاقته، وبعد أن يسترد وعيه يبكي بحرقة .
المذيعة: سلامتك يا سيد، لكن ليه بتعيَّط بحُرْقَة؟!
سيد "باكيا": نسيت اسمي.. "ما زال يبكي"، رن على أمي يا مصطفى واسألها اسمي الرباعي إيه.
مصطفى ينصت للموبايل: تمام تمام.. سيد محمد أحمد زكي..آه.. علشان داخل مسابقة، ويمكن يكسب مليون جنيه "يصمت قليلا": يا أم سيد يا أم سيد.. إيه الصوات اللي عندك ده؟.. الخط قطع.
المذيعة: انت خريج إيه يا سيد؟
سيد: خريج كلية آداب والله العظيم، وليا عشر سنين متخرج ومش لاقي شغل.
المذيعة: وكنت قسم إيه؟
سيد: قسم ضُهْر.
المذيعة "باستنكار وغضب": ستوب تصوير.. نعم يا روح أمك!.. أنت هاتهرج؟!.. يعني إيه قسم ضُهْر؟!!
سيد: ليه الغلط يا فندم؟.. قسم ضهر لأن كل المحاضرات بعد صلاة الضُّهْر.
المذيعة: صحصح معايا دول مليون جنيه يا سيد.
يسقط سيد مغشيا عليه للمرة الثانية ثم يفيق
المذيعة "بدهشة": تاني مرة يغمى عليك.. إنت عيان؟
سيد: لأ، أصلي كل ما أسمع المليون محِسِّش بحاجة.
المذيعة: أوك ركِّز بقى.. إنت خريج قسم إيه؟
سيد: تاريخ.. قسم تاريخ.
المذيعة: من حسن حظك.. لأن معظم الأسئلة في التاريخ.
يسجد سيد سجدة شكر، ثم ينهض ويقبِّل يديه .
المذيعة: أول سؤال.. من هو العالم المصري صاحب جائزة نوبل؟
سيد "بسرعة": أحمد شوبير.
المذيعة: هانعتبرها صح.. بس هو الدكتور أحمد زويل.
المذيعة: من أول مصري أصيب بإنفلونزا الفراخ؟
سيد: الأستاذ الكبير بشير الديك.
المذيعة: الله على سرعة الرد والبديهة الحاضرة.
المذيعة: تعرف تكمل مقولة رائعة بتجسد الوحدة الوطنية.. "الدين لله".. وإيه باقي الجملة؟
من خلف الكاميرا والناس المتجمعين، يُخْرِج صديقه مصطفى ورقة فولسكاب ويكتب عليها "والوطن للجميع"، ويرفعها فتختفي كلمة للجميع تحت أصابع يده .
سيد "بعد نظرة خاطفة على الورقة": الدين لله والوطن جريدة يومية مستقلة.
المذيعة: برافو.. فعلا الوطن جريدة يومية مستقلة.
المذيعة: سؤال بمناسبة نصر أكتوبر.. في أي عام كان انتصار مصر في حرب أكتوبر73؟
سيد: 73.
المذيعة: عظيم.. بالمناسبة يا سيد نجح جنودنا في تدمير خط دفاعي منيع على قناة السويس.. ما هو هذا الخط؟
سيد: خط حلوان المرج.
المذيع: هو بالتحديد خط حلوان عزبة النخل، بس هانمشيها.
المذيعة: مين العالم صاحب نظرية النسبية؟
كالعادة يغششه صديقه مصطفى من ورقة يرفعها من بعيد مكتوب عليها "أينشتَاين".. يلمح سيد الورقة فيجيب بسرعة
سيد: أنِيشْطَه.
المذيعة: بس دي عالمة، ماشي.. طب ما جنسية أينشتاين؟
سيد: ليبي.
المذيعة: هايل، طب من المصري مؤسس الطب الحديث؟
سيد: أبوشقرة.
المذيعة: أوك.. بس أبو شقرة على أي أساس؟
سيد:لأنه أول من توصَّل إلى العلاج بالنيفة.. قبل الكفتة بزمان.
المذيعة: تصقيف يا جماعة.. سيد بطل السوبر دونكي.
المذيعة "بيدها حقيبة": دول مليون إلا 400 ألف ضرايب.
سيد "يلتقط أنفاسه بصعوبة شديدة وكأنه يحتضر": شوية مَيَّه.. شوية ميَّه يا جماعة.. مش مهم الربعميت جنيه ضرايب، خدي كمان 200 باكو للبلد.. تحيا مصر تحيا مصر.
المذيعة: مصري أصيل يا سيد.. على العموم هاننتظرك في التليفزيون، هات معاك 600 ألف جنيه عشان تاخد المليون ماسكة بعضها.
