بالصور.. أغرب هدايا أول عريس.. هند: «كرتونة رنجة».. هبة: «إزازتين عصير».. أحمد: قال لأهلها أنا هدية العروسة.. إسلام: نص كيلو حلويات.. رحمة: «جاى إيد ورا وإيد قدام».. وأم

يحتار الشاب في الهدية المناسبة التي سيحضرها للعروس المتقدم إليها في أول زيارة لهم، وذلك لأنها ستعكس جزءا من شخصيته وتبنى بعض الفتيات فكرتها الأولى عن العريس من تقديره لها من خلال تلك الهدية إلا أن بعض الفتيات تفاجأن بما لا يتوقعنه من أول عريس يطرق الباب ومما أحضره بصحبته.

روى رواد موقع "فيس بوك" عبر صفحة الكومنت الفصيل هدية أول عريس في أول زيارة للمنزل.

نص كيلو حلويات
قال إسلام: "أقسم بالله أقسم بالله خطيب بنت عمتى كان جايب نص كيلو حلويات من أم الكيلو بـ16 جنيه، والحمد الله نزل زحلقة من على السلم".

لابس جلابية وجايب ربع كيلو بسبوسة
وأضاف يوتا: "واحد كان متقدملى كان جاي بجلابية وجايبلى ربع كيلو بسبوسة أنا من الصدمة سلمت وسبتهم ودخلت نمت وفهم أنه اترفض الحمد الله، معرفش جايلى بجلابية خرج من الصلاة عليا ولا إيه.. ومش مكسوف من نفسه وهو داخل بربع كيلو بسبوسة طب يكملهم نص كيلو عشان تكفيني أنا بس على الأقل".

إيد ورا وإيد قدام
وقالت رحمة: "أول واحد جاب فاكهة وشوكولاتة واترفض الحمد لله والتاني جاي إيد ورا وإيد قدام واتوافق عليه نصيب".

وأضافت وسام: "أول مرة ماجبش حاجة وقلبته عشان أصلا ماكنتش موافقة أشوفه تاني مرة اللى هو جوزي دلوقتي جاب شكولاتة من كلاسيك وتاني مرة جه شافني جاب علبة حلويات من كلاسيك برده المرة اللى وراها جابلى خاتم كانت قراية الفاتحة".

استفردت بالشيكولاتة في المطبخ
وروت فريدة: "علبة شوكولاتة وتورتاية وأنا عندى حساسية من الشوكولاتة أخدت العلبة وهما قاعدين في الصالة ودخلت المطبخ استفردت بالعلبة لوحدي.. ماما نادت عليا روحت خارجالهم لاقيتهم وقعوا في الأرض من الضحك وأنا مش فاهمة بعد ما قعدت لاقيت العريس بيقولى خدي المنديل دا الشوكولاتة ملحوسة بوقك.. وأنا خدت ديلي في سناني وقولت يافكيك وبقا خطيبي أهو وكل شوية يعايرني".

أنا هدية العروسة
وقال أحمد: "والله أعرف واحد صاحبي خد كيلو موز معاه وهو رايح يتقدم لأبوها روش شوية فبيقوله إيه دا يأبوحميد أنت جاي تتقدم لقرد.. قاله لا ياعمي دا ليكو أنتو.. أما العروسة فأنا هديتها".

كرتونة رنجة
وأضافت هند: "ابن عمتى وكان جاي في شم النسيم وجايبلي كرتونة رنجة وجايب أمه وهيباتوا وجايب غياراته معاه كمان وأنا مبحبش الرنجة أصلا.. ونسيت حاجة كان جايب أربع شيكولاتات معرفش فاكر نفسه جاي يزور بنت أخته الله يحرقه".

اترفض فطلب ثمن الجاتوه
وروت أميرة: "أنا واحد جه يتقدملى جاب جاتوه ولما أنا رفضته خد فلوس تمن الجاتوه من أخويا على أساس سلف".

إزازتين عصير
وقالت هبة: "أول عريس جه كان جايب إزازتين عصير واحدة جوافة وواحدة مانجة كان جاي يزرو عيانة ابن المبقعة.. لحد دلوقتي بتعاير بيها ومعرفش إيه ذنبي".