ناس طيبين قوى!
مش عارف ليه كل ما با شوف مسرحية "الواد سيد الشغال" وعادل إمام شغال بوس فى الممثلات وبيقول "ناس طيبين قوى" تنتابنى نوبات ضحك متواصلة، اللذيذ أن الرائع على نصير – أشهر محرر رياضى – يقول هذا الإفيه بطريقة تثير ضحك الجميع، حتى زميلنا - الذى توفت والدته منذ أيام - ضحك بشدة من إفيه على نصير، وما زال هذا الشاب الجميل يضفى على الجريدة أجواء البهجة والفرح والمرح...
وبالطبع كانت المسرحية منذ أكثر من عشر سنوات، فلم تكن الساحة سوداء بحكم الناس اللى مش طيبين على الإطلاق، فما نبيت فيه نصبح فيه .. مظاهرات وقتل وسحل وتعذيب وعاهات مستديمة، وتلقين المرشد للرئيس "القصاص .. القصاص أمرسى ..أمرسى القصاص" .. العالم كله سمع ما عدا مرسى .. ناس طيبين قوى..
الاقتصاد بايظ والبطالة زادت ومفيش حتى جاز للى زهقان واتخنق وعايز يولع فى نفسه .. والغلاء يطحن ملايين الأسر والناس بتشحت.. وفيه ناس بتكفر .. بعد ما شافوا الجماعة اللى بتقول عن نفسها الإخوان المسلمين .. إذا كان الإسلام كدب وقتل وسحل وتزوير وبلاوى سودة فالناس اللى إيمانها ضعيف كفروا .. خرجوا من الملة .. ده غير اللى انتحروا من شدة المعاناة ومناظر الدم والجثث اللى بيرموها جنب الزبالة وكل الحركات القذرة دى .. كل ده خلى الناس تقول على نظام مبارك " ناس طيبين قوى" .. ما اللى شاف معاملة مرات أبوه بيترحم على أمه .. واللى شاف أيام سودة أهو شاف اللى أسود منها ألف مرة ..
ناس طيبين قوى .. مرمطوا سمعة مصر .. مسحوا بيها البلاط .. حد يعمل كده فى أمه ياعالم .. يا ناس .. يا خلق .. ده الحيوانات لا يمكن تهين أمهاتهم .. يبقى البنى آدمين أقل من الحيوانات؟
بصراحة .. غمة وسوف تزول ويعود لمصر بريقها ونورها وعظمتها ومجدها بـ"ناس طيبين قوى"، وبالطبع لا يوجد بينهم كل اللى بالى بالك.
