إنتى جاية اشتغلى إيه.. قرداتى؟

القرد لو مات القرداتى يشتغل إيه؟.. حكمة قالها الحاصل على دكتوراه الفلسفة محمد بن مرسى.. رضى الله عنه وأرضاه، أنا أقول لك يشتغل إيه؟

هناك عدة وظائف متاحة للقرداتى.. اشتغلى سواقة.. اشتغلى قيادية فى أى حزب كرتونى ويتصيت.. وكل يوم تلاتين خبر نازلين كل يوم فى الجرايد والمواقع الإخبارية الإلكترونية.. رئيس الحزب راح.. رئيس الحزب جه.. اجتماع الهيئة العليا والسفلى.. وغيرها.
أو اشتغلى ناشط سياسى.. وبسهولة القرداتى يحط قدام اسمه حرف "الدال"، وممكن يكون ساقط إعدادية أو – بسم الله ما شاء الله – معاه دبلون تجارة.. ماهم الدابلون برضه مؤهل يا جماعة، والدولة بذات نفسيها معترفة بيه.. مش مصدقين؟.. طب ورحمة خالى حسن أبو على سرق المعزة.. زى ما باقول لكم كده.. والأكادة إن الناشط السياسى ده رزقه واسع قوى.. يخرج من القناة دى على القناة دكها على الفضائيات دوكهما.. وأهو ألفين من هنا على تلاتة من هناك والراجل يا دوب بيلم له عشر تلاف جنيه كل يوم.. بس يا حول الله.. بينام كل يوم ساعتين.. بس العداد بيعد والرصيد بيزيد.. اللهم لا حسد ولا قر.. بطلوا يا ناس يا شر..

إنت فكرك إن الناشط السياسى يفرق كتير عن القرداتى.. أهو كله بيرزق.. وماحدش بينام من غير عشا إلا اللى عامل دايت.. يا وله ما تعرفش يعنى إيه دايت.. ولا أنا.. أصل أنا – وأعوذ بالله من كلمة أنا- بعيد عنكم مش ناشط سياسى.. أنا يا دوب معايا حتة بكالوريوس إعلام.. والناس مقامات.. إيه اللى حيطوّلنى لدبلون التجارة والا الصنايع..

القرد لو مات تبقى البلد حلوة قوى.. وبصراحة إحنا شبعنا حركات وسخة من القرود والقرداتية.. يا رب توب علينا منهم ومن عمايلهم السودة.. قادر يا كريم.