البااارلمنجي: طلب إحاطة لجعل «الملوخية الناشفة» طبقا رئيسيا بدلا من «الفول المدمس» ترشيدًا للنفقات

أولا كل سنة وأنتم طيبين.. ثانيا أنا جمعتكم النهاردة بقى يا أهل دائرتى الكرام علشان نراجع مع بعض إنجازات البرلمان في دورة انعقاده الأولى.. يعنى إحنا كشعب استفدنا إيه من النواب اللى حضراتكم انتخبتوهم وسيبتونى أنا ابنكم اللى عايش بينكم وعارف مواجعكم وبلاويكم ومعاناتكم اليومية.

طبعًا ماحدش منكم استفاد بأى مصلحة.. اللهم إلا ضرايب زيادة وقيمة مضافة وخدمة مدنية وغلاء في أسعار سلعكم الأساسية من سجاير وكروت شحن وخلافه.. فالباشاوات اللى حضراتكم انتخبتوهم على حسابى في الدايرة مالهمش أي طلب إحاطة يعبر عن مشكلاتكم حتى يومنا هذا.

طب حد هيسألنى: لو انت مكانهم كنت عملت إيه يعنى ياعم البااارلمنجى؟! وانا هجاوب حضرتك وهقولك إنى كنت هقدم كل يوم طلب إحاطة لتخفيف العبء عنك كمواطن.
فأنا عندى أفكار لتوفير العملة الصعبة للحكومة وتوفير نفقاتكم كمواطنين عاديين.. يعنى مثلا آدى طلب إحاطة موجود في جيبى وجاهز منذ أيام الانتخابات.. أطالب فيه بجعل طبق «الملوخية الناشفة» هو الطبق الرئيسى للمصريين بدلا من طبق «الفول المدمس».

أولا لأن الملوخية الناشفة رخيصة الثمن.. وممكن الاستفادة منها على مدى العام.. ثانيا كيلو الملوخية الناشفة يعمل 60 طبقا بعكس كيلو الفول يعمل 20 طبقا.. بالإضافة إلى أن الدولة تستورد الفول طوال العام لكنها لا تستورد الملوخية أبدًا.. ثالثا طبق الفول وصل سعره لـ 5 جنيهات بينما طبق الملوخية هيبقى سعره جنيه واحد.. رابعا زى ما فيه فول بالزيت الحار وفول بالزيت الحلو هيكون فيه ملوخية بالدقة وملوخيه باللية لعشاق الضانى.. خامسا الفول بيجيب القولون لكن الملوخية الناشفة مابتجيبش حاجة خالص لأنها لا تنفع ولا تضر.. دا بالإضافة إلى أن عربية الفول بتشتغل بالنهار بس بينما عربية الملوخية هتشتغل 24 ساعة.. ها إزيكم بقاااااااااااااااا؟!

مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.