بالفيديو.. كساد بسوق الأضاحي قبل موسم عيد الأضحى بسبب ارتفاع الأسعار.. وجزارون: الأعلاف غالية.. كيلو الخرفان بـ40 جنيها والعزب بـ38 وهتزيد قبل العيد.. السوق مش شغال.. مافيش زباين والناس تعبانة
مع اقتراب موسم عيد الأضحى المبارك كل عام يكثر الجدل حول أسعار الأضاحي، وفي ظل الظروف الاقتصادية الصعبة التي تشهدها البلاد في الوقت الحالي، يشهد سوق المواشي ارتفاعا كبيرا في الأسعار بشكل غير مسبوق، ما يدفع الكثيرين ممن اعتادوا على شراء الأضاحي الاكتفاء هذا العام بشراء اللحوم.
رصد الأسعار
نزلت عدسة "فيتو" لرصد أسعار الحيوانات قبل أيام قليلة من عيد الأضحى المبارك، ومعرفة أسباب الارتفاع غير المسبوق في الأسعار.
الأعلاف السبب
قال المعلم أحمد، جزار: "السعر هنا في مدبح مصر موحد والخرفان الكيلو دلوقتى موحد بـ40 جنيها، والأسعار زادت عن الأسبوع اللى فات، وكل ده بسبب ارتفاع أسعار الأعلاف".
«السوق واقف»
وأضاف المعلم سعيد، جزار: "حاليا لحمة الخرفان من 38 لـ40 جنيها للكيلو، ودى أعلى حاجة، والأسعار ثابتة من الأسبوع اللى فات مازادتش وماعرفش هتزيد قبل العيد ولا لأ، والسوق واقف ومافيش ناس زى كل سنة".
هتزيد قبل العيد
وأكد المعلم حسين: "الغنم الأسبوع ده بـ42 جنيها والأسبوع اللى فات كان الكيلو بـ39 وممكن تزيد قبل العيد"، وأوضح حامد: "العجول وصلت 40 جنيها للكيلو أما الأسبوع اللى فات كانت بـ37 و38، وكل يوم بسعر وممكن جدا تزيد تانى في الفترة اللى قبل العيد والغلو موقف السوق".
مافيش زباين
وعلق رزق قائلا: "العزب بـ37 والعجول وصلت 40 وزادت جنيه عن الأسبوع اللى فات، بس إحنا بنبيع بـ38 عشان مافيش زباين، أنا بقالى 15 يوم بالنقلة دى وبعتبر مابعتش منها حاجة".
الناس تعبانة
وأشار محمود قائلا: "الأسعار دلوقتى وصلت 40 والعزب 37 والأسعار زادت كتير عن السنة اللى فاتت ومافيش إقبال الناس تعبانة ومافيش فلوس".
وأضاف المعلم عبد الرحمن: "الأسعار زادت والكيلو وصل 40 وبيوصل 41، أما العزب 38، أما السنة اللى فاتت كنا بنبيع العجول بـ33 جنيها والعزب 32 وممكن تزيد قبل العيد تانى.
