محمد إيهاب يرد على أحد منتقديه: «مصاريف رفع الأثقال أكثر من الجواز»
انتقد إسلام البحراوي، أحد الشباب المصريين، بطل رفع الأثقال الحائز على الميدالية البرونزية في أوليمبياد ريو 2016 محمد إيهاب، بعد أن أكد إيهاب في أحد البرامج أنه يعيش في شقة ضيقة، 60 مترا، وأن مرتبه ضعيف لا يتجاوز 2000 جنيه وأحد الرعاة يقدم له 3 آلاف جنيه في الشهر، وأن مكافأة الميدالية سيكون نحو 450 ألف جنيه بعد خصم الضرائب، وأنها غير كافية لأن يتزوج أو يعيش بهم.
وقال البحراوي للبطل محمد إيهاب "أيوه حضرتك تعبت جدا أيوه حضرتك شرفت مصر بس أنت لو بقالك 3 سنين بيتصرف عليك فلوس قليلة عشان في الآخر تلاقي نتيجة تعبك تساوي نص مليون جنيه.. عاوز أقول لسيادتك والله العظيم أعرف شباب زي الورد بقالهم سنتين بيجروا في كل الجهات والبنوك عشان قرض بخمس آلاف جنيه عشان يعملوا مشروع صغير.. ولحد الآن ماحدش أخد القرض".
فما كان من محمد إيهاب إلا أن رد عليه عبر تدوينة على فيس بوك قائلًا "كلام جميل من راجل محترم ولو مكانك هاقول كده وأكتر من كده كمان... لكن أحب أوضحلك وأقولك مصاريف رياضة رفع الأثقال للوصول لميدالية أوليمبية أصعب بكثير من الجواز ولو أنت شايف إن المبلغ اللى جايلى ده بعد 18 سنة تدريب وبطولات كتير عليا وأنه هيكفينى أسدد اللى عليا واشترى شقة واتجوز به واستعد لأوليمبياد طوكيو به عشان أنافس على الدهب يبقى مافيش غير إنك تلعب رفع الأثقال ومبرووك عليك المكافآت.. ولو ماقدرتش لعب ابنك ووقتها إبقى أحكم بنفسك وربنا يكفيك شر الجلطات".
