بهلول المشغول: اضحك كركر حكومتك حلوة زي السكر
قولى يا واد يا أبو الشطار
إزاى هتكمل المشوار
هتأكلنا واتشربنا...
واللا هتصرف ع المعمار؟!
الصندوق إدالك قرض
وفرض شروطه علينا فرض
والبرلمان وافق عليه
بدون ما ياخد منك وعد
باهية الدنيا أهه يا حكومة
وأوعى تقولى إنك مظلومة
بس يا ريت نشوفك يوم
شغالة بس بمنظومة
واسمع منى لما أقول
أنا برضو عمك بهلول
أنا من دمك شايل همك
وببلادى دايمًا مشغول
جايز أكون بضحك وبكركر
وبقول حكومتنا زى السكر
وعشمان ييجى علينا يوم
في لقمة عيشنا ولا بنفكر
لكن حاسب منى فـ يوم
أتحول لمواطن مهموم
ساعتها هتشرب منى المُر
ومش هتشوف عينيك النوم
