بالفيديو.. الأعلاف والدولار سر ارتفاع أسعار الأضحية
يٌلقي كل منا بالتُهم جزافا على غيره، حيث تتبادل الاتهامات بين كل من "التاجر والجزار والمواطن"؟!، فمن المُلاحظ أن ارتفاع أسعار اللحوم لا تكمن المشكلة فيها على عاتق "الجزار" فقط، بل تتخذ شكل مثلث متساوي الأضلاع.
يتهم المواطن الجزار بالجشع!، والجزار يلوم التاجر، والتاجر والمُربي يعانيان من ارتفاع أسعار الأعلاف، وتاجر الأعلاف يري أن الحكومة لا تٌبدي اهتماما وتغض الطرف ولا توفر دعما، فارتفاع سعر الأعلاف سيؤثر بالضرورة على سعر الماشية مع اقتراب عيد الأضحى المبارك، والذي بدوره يثُقل كاهل المواطن البسيط، وفي هذ الصدد انتقلت "فيتو" لمحاورة اثنين من تجار الأعلاف، كان أولهما الحاج رزق على "تاجر أعلاف" بحي مدبح السيدة القديم.
بدأ الحاج رزق حديثه، قائلًا: "فعلا الأعلاف غالية جدا عن السنة اللي فاتت، السنة اللي فاتت كانت شيكارة الذرة بـ 90 و95 جنيها، لكن دلوقتي بتعدي 150 و155 جنيها".
وأضاف: "الردة السنة اللي فاتت كانت بـ 1400 و1600 جنيه ،النهارده بقيت 2750 وبتوصل لـ 3000 جنيه كمان، وفي حين أن "الردة " من خمس وست سنين مكانتش بتعدي الـ 800 جنيه، دلوقتي بعد ارتفاع سعر الدولار أصبحت تسعيرتها 2400 وفي السوق السودة بتوصل لـ 2800 جنيه".
وذكر: "أن العجل بياكل في اليوم بنحو 50 لـ 60 جنيها، وانا بشتري من مطحن السيدة زينب وتكلفة نقل الطن بتكلف 50 جنيها".
أضاف الحاج رزق: "الأعلاف درجات وأنواع، في كُسب درجة أولى وثانية وثالثة، وفي ردة وذرة وكل ده بيستخدم للتسمين، وفي علف للبن وهو المُستخلص وده أغلي انواع الأعلاف وبيعدي الـ 3500 جينه للطن".
وتابع الحاج عبد الرحمن شقيق الحاج رزق حديثه قائلا: "الدكانة دي كانت مليانة بضاعة من ثلاث سنوات ودلوقتي بقيت فاضية ومفيهاش حاجة واللي بنبيعه بنصرفه، وانت واقف بقالك ساعة أهو ومفيش زبون دخل".
وأضاف: "أخويا له بيت وأنا ليا بيت وعامل معانا له بيت كمان ، يعني محتاجين في اليوم مكسب أقل حاجة 300 جنيه، وإحنا مبنبعش بـ 200 جنيه كل يوم، مكسبهم 10 أو 15 جنيها، البلد تعبانة وفي علافين كتير قفلت.
والتقت "فيتو" كذلك بتاجر أعلاف "محمود محمد"، الذي يقبع حانوته "الباشا لتجارة الأعلاف" في منطقة المَدبح، ويرجع تاريخه لأكثر من مائة عام ، وبدأ حديثه معنا كما يلي.
بدأ محمود حديثه بقوله: "ترتبط أسعار الأعلاف لدى وخصوصا الذرة بسعر صرف الدولار، لأن الذرة اللي عندي مستوردة ، وعشان كده بتتباين وبتختلف سعر الذرة، فبتعلي لما الدولار يعلي وبتستقر لما الدولار ينزل، وكذلك يرتبط أسعار كافة الأعلاف بسعر الذرة ، يعني تقدر تقول كده أن الدرة أساس لكل سعر عندي، والسنة اللي فاتت الذرة كانت بـ 2 أو 2.50 جنيه للكيلو، ودلوقتي بقت 3.50 وداخل على 4 إلا ربع جنيه للكيلو وكذلك الكسب وبقية الأعلاف عليت ومفيش حاجة نزلت، والذرة أكتر حاجة بيحتاجها التاجر عشان يسمن العجل، ودلوقتي محدش بيشتري الذرة لأنها غليت أوي ومحدش قادر على تمنها".
ركود السوق
أضاف قائلا: "كنا قبل كده بنقلب العلف والمحل مكانش بيكفي وكنا بنقفل الشارع ونقلب فيه ، دلوقتي نايمة خالص ومفيش حد بيشتري وكنا بنيجي قبل العيد ييجي بشهر واكتر كنا بنكسب ييجي بـ 200 أو 300 جنيه في اليوم".
وأشار إلى:"أن الأعلاف بتيجي قبل العيد سعرها بيعلي اوي وبتزيد ، فالذرة الصفراء زادت أوي قبل العيد وسعرها مش مستقر، مرة تطلع ومرة تنزل "، وتابع: "كنا قبل كده أكتر من 5 أفراد أيام ما كان الحال ماشي، ولكن دلوقتي معدش غيري، واللي كانوا شغالين معانا كان العامل بياخد 50 جنيها في اليوم، وهي دلوقتي مبنكسبش 200 جنيه في اليوم، ودا غير تكلفة النقل والتحميل في المطحن ودا بيضاف على سعر العلف ".
