فرحان من بدري

عزيزي القارئ.. أنا عارف إنك مش ناقص وفيك اللي مكفيك، الغلاء والأقساط، وأحوال البلد مخليينَك مش على بعضك.. بس معلش، اعصر على نفسك ليمونة واقرأ الكلمتين دول يمكن.. يكمن.. "تستفيد".!.

أنا عارف إنك مش طايق نفسك، وإنك حتى لو مفيش حاجة مزعلاك برضه إنت مش مظبوط، بس تعالي نفكر سوا كدة، ونبص لنص الكباية المليان!

هل عُمرك سألت نفسك إيه أخرة الزعل والنكد اللي أنت فيه ده ؟
الإجابة: ولا أي حاجة.. غير نكد أكتر.. ونكد يعني حرقة دم.. وحرقة الدم يعني ضغط.. والضغط لا قدر الله هيقلب بسكر.. وهُب نيجي نزورك في المستشفي الخاصة أم فلوس. "يعني إنت الخسران".

طب وعلي إيه.. بذمتك ليها لازمة ؟

أقولك على سر.. إنت في إيدك الحل.. أي والله إنت في إيدك الحل.. ماهو أنت برضه مقضيها نكد في نكد ومش مدى نفسك فرصة حتى تشوف أي حاجة حلوة حواليك.!

•نسيت أيام زمان وأيام الهنا اللي كُنت فيه ؟
•نسيت أيام العيلة واللمة الحلوة والعشوة اللي مع قرايبك؟
•نسيت أيام المصيف والضحك وصورتك وإنت على رجل أبوك؟
•نسيت أيام المدرسة والفسحة والخروجة بتاعة آخر يوم امتحان؟
•نسيت أيام الكانتين وحصص الرسم والموسيقي والألعاب؟
•نسيت أيام السهر على الكنبة قدام فيلم حلو بتحبه؟
•نسيت أيام الكارتون وبكار والمغامرين الخمسة ؟
•نسيت سلة لعبك اللي كانت مليانة بأصحاب كتير؟
•نسيت وقفة البلكونة وريحة المطر ؟
•نسيت أول يوم جامعة وصحاب الجامعة ؟
•نسيت أول حب في حياتك ؟
•نسيت شكل الشارع في رمضان ؟
•نسيت ليلة العيد ؟
•نسيت الدش السخن والنومة اللي كانت من بعده أوام ؟
•نسيت لعب الشارع والسيجا والأتاري وبنك الحظ؟
•نسيت القاعدة قدام حفلات ليالي التليفزيون ؟
•نسيت شريط الكاسيت أبو تلاتة جنيه ؟
•نسيت ساندوتشات الجبنة بالخيار اللي كانت في الكيس إياه ؟
•نسيت الرحلات وصوتك اللي اتنبح في سلمي يا سلامة ؟
•نسيت إنك فرحان من بدري ؟

للأسف.. أيوة إنت نسيت.. مش بس كدة ده إنت بتتناسي كمان بحجة الأيام الصعبة، أنا عارف إن الأيام الصعبة مابتخلصش والظروف فعلًا بايخة، بس لو ركزت هتلاقي إن نفس الشخص بتاع دلوقتي هو هو بتاع زمان، إنت هو وهو إنت.. بس الفرق بين زمان ودلوقتي إن زمان كان قلبك قلب طفل، والأطفال أحباب الله، للأسف إحنا لما كبرنا.. صغر معانا حُبنا لربنا.. خدها مني قاعدة:
"هتحب ربنا.. هتقرب منه.. هتشوف فرح عظيم" .