بالصور.. مأساة شاب رفضت الإمارات علاجه ويرقد بدار مسنين في مصر

أرسل مواطن رسالة مؤثرة عبر خدمة «واتس آب فيتو»، استعرض فيها حالة إنسانية لشاب مصري تعرض لحادث بدولة الإمارات، ورفضت شركة التأمين هناك علاجه ورحلته إلى مصر ليعيش في دار مسنين بين الحياة والموت، وجاءت نص الرسالة كما يلي:

«أيمن شاب زينا كلنا كان عايش حياته عادي وكان ناجح في شغله وشغال في الإمارات...وفى يوم من الأيام عمل حادثة.. الحادثة تسببت في أنه دخل في غيبوبة وعمل أربع عمليات في المخ تسببت في أنه بقي في غيبوبة تامة.. أيمن شاب في عز شبابه حاليا فاتح عينيه بس.. أهل أيمن اللي زي معظم أهالينا ناس بسيطة جم الإمارات وفضلوا معاه.. حالة أيمن مافيهاش أي تطور بل بالعكس بتسوء لأن أيمن نزلوه مصر عشان شركة التأمين في الإمارات وقفت علاجه..

أيمن حاليا بعد سنة ونص في غيبوبة موجود في دار مسنين.. أيوة شاب في عز شبابه موجود في دار مسنين المفروض أنه يستنى الموت أو فرج ربنا أن أي مسئول أو رجل أعمال يتحرك ويسفره ألمانيا يتعالج.. أيمن علاجه بره مصر هيكون بمبلغ كبير جدا.. بس مش كبير على ربنا أن الموضوع يوصل زي حالات كتير وأنه يتعالج ويبقى كويس.. أيمن في دار مسنين اسمها "روضة المعافاة للنقاهة" في مدينة نصر اللي عايز يساعد يقدر يروح هناك.

مؤمن جدا أن الخير يُرد ولو بعد حين.. النهارده بتقف جنب شخص في محنة حقيقة.. بكرة لأن الدنيا مش دايما حلوة هتقف الناس جنبك في محنتك.. هي دايرة وكلنا بندور فيها.

كل يوم بيفوت حالته بتسوء يا ريت الناس كلها تعمل شير لعل وعسى توصل لأي رجل أعمال أو مسئول حكومي..

ده رقم أخو أيمن 0122 900 2923 حضرتك ممكن تكلمه في حال من ثلاث: إما تدبير فرصة له للسفر للعلاج بالخارج..... توصيله لدكتور متميز في العلاج الطبيعي والنقاهة....... أو أن تدعو لهم بظهر الغيب دعوة طيبة عسى الله أن يستجيبها لك وحذار أن تقوم بجرح مشاعرهم وتأكد أنه كما تدين تدان وجزااااكم الله كل خير».