أحمد الغرباوي يكتب: «حبيبي.. عشقي من حزنك غيران»
حبيبي
لو مِش زَعلان
يا تَرى مُمكن تِحبّنى
زي ما حَبّيتك
إمبارح والنهاردة والآنْ؟
وفي ضِلّك
تِشوفني واحد
مِش إتنين زي زَمانْ؟
وفي مِرايْتك
راسك عَلى صَدري
وشَعري حِجابك
مَغطيك وسَترك حَنانْ!
حبيبي
لَو مِش زَعْلان
في مَايَّة عِينيك
سِيب روحي شِويّة
تِتمرّغ والنّيني
رَقَّصة فِ شَهد الرُّمّانْ؟
وِتدفِّي عِشقي البَردانْ؟
والمُرّ اللي فِ دَمعي
يا حبيبي
بيداوي جَرحي الظمآنْ
وفي حَرارى دَمِّي
تِحسّ شوقي رَيّانْ
وفي لَمْسة إيدك
يِوَقّف نَزفه كَمان!
حبيبي
دَه أنا الّلى فِ زَعلك
عِشقي المَحروم
مِن حُزنك غَيْرانْ!
حبيبي
لَو مِش زَعلان
اصرخ
قولّى بَحبّك
أو يِمْكن أحبّك
بَسّ في حُبّك
ماتِسيبنيش حَيْرانْ!
وفي يمِّ عِشقك
ماتِسيبنيش غَرقانْ!
