هاشتاج «ضد ارتفاع الأسعار» يتصدر «تويتر».. بسنت: «هناكل بعض».. سعد: «مفيش جواز».. محمد: «إحنا بس اللي بنرخص».. أحمد: «الذهب هيبقي بالدولار».

أطلق مستخدمو موقع التواصل الاجتماعى «تويتر»، اليوم السبت، هاشتاجًا جديدًا تحت عنوان «ضد ارتفاع الأسعار»، تصدر أكثر الموضوعات تداولًا عبر الموقع، وتفاعل معه الكثير من المصريين، مستنكرين خلاله غلاء الأسعار الذي أصبح وحشًا يلتهم مرتباتهم، ومن جانبها رصدت «فيتو» أبرز التعليقات.

«كلسون أبويا»
قال وليد فاضل: «جشع التجار هو السبب وكمان الشعب اللي مش قادر يستغنى»، وأضاف محمد محمود: «إحنا بس اللى بنرخص»، فيما قال أحمد علي: «الأسعار بتولع نار.. والدهب هيبقي بالدولار»، وأضافت هالة الطوخى: «كله ماشي بالمشقلب»، وقالت زينب كريم ساخرة: «في بنطلون عجبنى أوى وكنت هموت عليه ولما رحت أسأل على سعره طلع بـ 900 جنيه ماله كلسون أبويا».

وغردت إنجى مهران ساخرة: «جنيه إيه اللي عايز تقومه على رجله مش لما نقوم إحنا على رجلينا الأول»، وقالت سمر محمد: «إنتوا بتكلموا في إيه الناس بتموت ! محدش واخد منها حاجة»، فيما قالت نور مصطفى: «لازم نفكر في الغلبان يعني هتبقوا إنتوا والزمن عليه».

«مفيش لحمة»
وقالت أميرة مراد: «كل حاجة بتغلى إلا البني آدم هو اللى بيرخص»، فيما قالت بسنت ناصر: «هناكل بعض بعد كده فين الدولة»، وقال ميدو بركات: «البلد هتولع نار والكل ضد ارتفاع الأسعار»، وأضاف إسلام الحوت قائلا: «علشان أنا بشتغل بإيدي مش بقضيها وألاقي فلوس حاسس بالغلاء، اللي مش حاسس بقي يبقى ربنا يخلي اللي بيصرف عليه».

وغردت سارة وليد قائلة: «الأسعار بتزيد والمرتبات زي ما هي والمفروض إنك بنفس المرتب تشتري السلعة اللى تمنها بقى الضعف لو مش أكثر»، وأضافت سمر فتحى: «حرام عليكم الناس مش لاقية تاكل»، وقال سعد عربى: «بح خلاص مفيش جواز مفيش لحمة مفيش مفيش مفيش».

«شعب استهلاكي»
وقالت إنجى مهران: «حرام يا عالم»، وغرد ميدو بركات ساخرا: «هو في إيه رخيص ألحق أشتريه وأعينه»، وأضاف هيما محمد: «تحس إن الدولار ده سوبر مان بياخد الأسعار ويطلع بيها لفوق وبعدين ينزل هو ويسيبها وإحنا اللي نتعور»، وغردت سناء جميل قائلة: «إحنا زهقنا والله دي مش عيشة».

وغردت سارة صلاح: «حوار إن الأسعار زادت مخليني عايزة أنزل الشارع أطبطب على كل حد غلبان في البلد وأساعده بكل طاقتي.. حسبي الله»، وقال إيهاب البوب: «الناس خلاص ضميرها مات والغلبان مالوش مكان»، فيما قالت إسراء صلاح: «كلنا ضد ارتفاع الأسعار بس تعالوا نتفق إن الشعب جزء من المشكلة، إحنا شعب استهلاكي بطريقة مش طبيعية والتجار عندهم جشع».