«تخاريف» قصيدة للشاعر رضا عواد
يا موشوشين الودع
ماتوشوشوه بشويش
قلبي اللى ياما اتوجع
حبك في لحظة طيش
أصبح في حبك ولى
والحضرة والدراويش
مشتاق يموت من العشق
مع أنه نفسه يعيش
يا موشوشين الودع
ماتوشوشوه بشويش
----------
يادينى من بعد الدين
يا جنتى وناري
قلبى أنا المسكين
عاشقك وبيدارى
قايم في ليل وصلك
يجرى على فرضك
يتوضأ من دمعه
روحى عشان روحك
أصبحتى أذكارى
-----------
عيونك بيبان الجنة
ورحمة نزلها ربنا على عباده
البى نداهم ولا لحظة أستنى
وإن شافوا ضعفى
في القسوة يتمادوا
وإنتى الوتر
والنافلة والفرض
شايفك إنا جنتى
ماشية أهى عالأرض
بتسكنينى النار
في كل لحظة بعد
----------
ياموجوعين من الألم
داوا الألم بالبوح
الفضفضة ترياق
يشفى اللى كان مجروح
من إمتى كان الدوا
في الشكوى ولا النوح
قرب الأحبة غاية
تترد بيه الروح
فيا مالكة روحى
اسمحيلى إنى أعيش
مكتوبى أنا في الهوى
عينى تشوف بيكى
روحك تكون روحى
أصرخ بكلام الحب
وأنتى مابترديش
فيا موشوشين الودع
ماتوشوشوه بشويش
