صلاح جاهين يكتب: فرحة القنال
بمناسبة الذكرى الأولى لقرار الرئيس جمال عبد الناصر تأميم قناة السويس، نشرت مجلة «الإذاعة» في يوليو 1957 القصيدة التي كتبها الشاعر صلاح جاهين ولحنها محمد الموجى وغنتها أم كلثوم باسم «فرحة القنال» يقول فيها:
محلاك يامصرى وانت على الدفة.. والنصرة عاملة ف القنال زفة.. يا ولاد بلدنا تعالوا على الضفة
شاورولهم، غنوا لهم، وقولوا لهم، ريسنا قال، مافيش محال راح الدخيل وابن البلد كفى.
حيوا الرجال السمر فوق السفينة.. حيوا اللى جاهدوا علشان مايفرح وادينا
بصت لنا الدنيا وشافت عملهم.. غنت بكل لسان على كل مينا
انا قلبى فاكر لسة مين اللى جارحه.. ولولا يوم النصر ماتلم جرحه
شفت القنال في أيدين رجال من بلادى.. رفرف عليهم قلبى من كتر فرحه
كتب جاهين مطلع الأغنية يقول فيها «يا أهل مصر تعالوا على الدفة» فغيرتها أم كلثوم إلى يا ولاد بلدنا تعالوا على الدفة، وقالت لجاهين «ياولاد بلدنا كلمة شعبية حلوة وأهل مصر دى خطبة متنفعش إلا في مجلس الأمة» كما كان عنوان القصيدة عيد القنال غيرتها أم كلثوم إلى فرحة القنال.
حفظت أم كلثوم اللحن في 4 بروفات وقام الموجى بتحفيظ أفراد الفرقة واحدًا واحدًا.
