نشطاء يسخرون من نتيجة أوائل الثانوية العامة.. كريم: بلاش تتعلم برا عندك المنوفية بلد الأوائل.. عبد السلام: البلد كلها جابت 409.5.. مجدي:اللهم اجعل الدرجات مثل عرضيات أحمد فتحي..ومحمد:المنايفة الأوائل

دشن نشطاء مواقع التواصل الاجتماعي "فيس بوك وتويتر" هاشتاجا بعنوان "ثانوية عامة"، الذي تصدر تراند مصر على تويتر، ساخرين من ارتفاع عدد أوائل الثانوية العامة بمحافظة المنوفية، وحصول عدد كبير من أوائل الثانوية العامة على 409.5 درجات، مطالبين كل من يريد التفوق أن يذهب إلى محافظة المنوفية، التي انقسم سكانها بين متفوقين ورؤساء.

المنوفية
قال كريم طارق: "بلاش كلمة تتعلم برا... عندك المنوفية أهو بلد الأوائل كلها"، وأضاف عبد السلام أبو عيسى" "البلد كلها جابت 409.5"، وذكر محمود زمبيا: "ثانوية عامة مفيش دكر من أسيوط كله المنوفية"، ورد خالد عيسى:"أنا من رأيى ينادى ع الأسامى اللى جايبة أقل من 490.5 أسهل".

وتابع مجدي أحمد: "اللهم اجعل درجات الثانوية العامة عالية مثل عرضيات أحمد فتحي.. ثانوية عامة".

لجنة واحدة
وكتب عمر السبيعي: "الأوائل دول بيأكدوا أن اللي بني مصر كان في الأصل منوفي"، وأضاف حسام الخولي: "هيا ٤٠٩.٥ دى مالها لمت كده ليه"، وعلق بوشا بقوله: "عاجبنى أوى نظام اتنين صحاب في المنوفية في لجنة واحدة وجايبين نفس الدرجة".
ورد أحمد بن خليل قائلا: "ياجدعان الناس اللي في ثانوية عامة السنة دي ورقها وعلي أية مدرسة في المنوفية.

12 طالبا
وقال محمود عزوز: "12 طالبا منوفا من الأوائل"، وأضاف محمد أيمون: "ثانوية عامة المنايفة كلهم أوائل تقريبًا.. هما دول اللى هيبقوا رؤساء في المستقبل".

وسخر حمودة بن زمورا قائلا: "12 طالب من الأوائل من المنوفية.. والأول على الجمهورية منوفي.. المنوفية تحكم.. كمية الناس إلى أخدت الأوائل في شعبة علمي علوم أكتر من سكان قطر"، وعلق إبراهيم سمير: "دا بتوع أدبى الأوائل مجوش ربع علمى علوم".
وكتب إسلام: "جبت كام في الثانوية؟.. 60 %.. نعم بتقوول إيه.. لا أنا بقول أذكار"، وتابع موالي عمر:"409.5 المجاميع مرتفعة جدا.. هتتظبطوا في التنسيق السنة دي".

ماسورة البنات
وقال نادر نايل:"وزي ما احنا شايفين مصر مقسومة لنصين نص عبارة عن أوائل.. ثانوية عامة.. من المنوفيّة، ونص تانى عبارة عن رؤوساء من المنوفية"، وأضاف أحمد فودة: "المنوفية والصعيد يسيطرون ع الأوائل عباقرة مصر".

وعلقت رحاب محمود قائلة: "إيه ماسورة البنات اللي طفحت في علمي علوم دي"، ورد سارة يامن بقوله: " 117 ألف واحد هيمتحنوا دور تاني!!!!! هو شاومينج كان بيغشش غلط ولا إيه".

وذكر الجاحر: "تقريبا نص طلبة.. ثانوية عامة الأول مكرر409.5 ونصهم منايفة وباقي المنايفة هيدخلوا كليات عسكرية ويحكموا مصر"، وتابع حمد سيد: "المنوفية وربنا أثبتت وجودها عشان منتريقش عليهم تانى.. ناس كتير أوى طالعين أوائل منها.. ده انتوا منايفه فعلًا".