دوري أهلاوى وقمة «بلا طعم».. أحمد: «واكلين كحك لغاية لما اتعموا».. محمد: «يلعبوا جول مشترك».. ميدو: «بطعم الكورة الشراب».. رحمة: «بيلعبوا في مركز شباب التو
وصف مستخدمو مواقع التواصل الاجتماعى القمة 112 التي أقيمت مساء اليوم السبت، على ملعب استاد الجيش بالسويس، أسوأ مباريات القمة التي شهدها الدوري العام المصرى منذ انطلاقه، ومن جانبها رصدت «فيتو» بعض تعليقات جماهير قطبى الكرة المصرية.
«اللاعيبه مجهدة»
سخر عمر سعد من مباراة القمة قائلا: «دا ماتش القمة بس اللاعيبه مجهدة شوية»، وأضافت رحمة سعيد: «تحس إنهم بيلعبوا في مركز شباب التوفيقية»، وقال أحمد محمود: «اللاعيبة واكلة بيتيفور وكعك لغاية لما اتعموا دول مش قادرين يجروا»، وقالت سامية فكرى: «مش صعبان عليا غير الراجل الأجنبي اللي جايبينو من أقصى أوروبا الشمالية يحكم ماتش مالوش أي 30 لأزمة».
وقال محمد إسماعيل: «المفروض على الملعب ده وبالإضاءة دي آخرهم يلعبوا جول مشترك»، وسخر هانى كندارى من ملعب المبارة قائلا: «تحس إنها رملة بحر مش نجيلة»، وأضاف مجدى كمال ساخرا: «الرياح الشمالية الغربية في السويس هي السبب في الماتش الوحش ده»، وقال على المصرى: «ماتش زي القرف جه الزمن اللي بشوف فيه الأهلي بيدافع قدام الزمالك».
«لا يليق بالقمة»
وغرد محمد محمود قائلا: «ماتش بارد اللعيبة زي ما يكون ملهاش مزاج تلعب»، وقالت ندى محمد: «ده مش ماتش دي سلطة»، فيما قال جمال الهوارى: «كرهتوني في أكتر حاجة بحبها إلى هي الكورة»، وأضافت توتا: «أقسم بالله لو متفقين يتعادلوا مش هيلعبوا كده»، وأضاف علاء اللول: «مستواى لا يليق بالقمة بالنسبة للفرقين».
وقالت منى مجدى: «تحس الفرقتين راضيين كده!! احيييه ده ميستاهلش حرقة الدم ولا تعب القولون والعصبية اللي احنا فيها من امبارح»، وقال محمد العطار: «أسوأ مباراة قمة في تاريخ الدوري العام»، وأضافت رنا محمود: «كل عشر دقايق يادوب ببص على الشاشة جايز يكون جه جون ولا حاجة لأني قافل الصوت بلاش حرقة دم»، فيما قال ميدو البوب: «مباراة قمة بطعم الكورة الشراب، مافيش كورة بدون جمهور، ياترجعوا الجمهور ياتبطلوا كورة في مصر».
«الكورة للجماهير»
وقالت الإعلامية ياسمين الخطيب ساخرة من حكم المبارة: «الحكم ده بيوزع كروت صفرا أكتر ما أنا بوزع ابتسامات!»، وأضافت في تغريدة أخرى: «مبارة باهتة.. أتمنى أن تهتز مدرجات البطولة القادمة بصوت الجماهير.. افتحولنا المدرجات بقى.. الكورة للجماهير».
وكانت مباراة الزمالك والأهلي، انتهت بتعادل الفريقين بهدف لكل منهما في المباراة التي أقيمت على ملعب استاد الجيش بالسويس، ضمن مباريات الجولة الختامية من منافسات الدوري الممتاز.
