بالمستندات.. نص التحقيقات مع المتهمين بالنصب على أهالي مختطفي ليبيا
قررت محكمة جنح أول مدينة نصر تأجيل محاكمة مصرى وآخر ليبي لاتهامهما بالنصب على أهالي 20 مصريا مختطفا بدولة ليبيا والاستيلاء منهم على مبالغ مالية قدرها 215 ألف جنيه بدعوى التوسط لتحريرهم، لجلسة السبت المقبل لإحالتها للدائرة المختصة.
وحصلت «فيتو» على نسخة من نص التحقيقات مع المتهمين التي أجراها المستشار كريم حنفى وكيل نيابة أول مدينة نصر..
اسمك وسنك وعنوانك؟
اسمي أبو النجا عبدالواحد شغال عامل، وساكن في كفر دمرو مركز المحلة الكبرى الغربية.
س: ما معلوماتك بشأن الواقعة محل التحقيق؟
ج: اللي حصل أن ابن اخويا شغال ف ليبيا كهربائي ومن شهر تقريبا لقيت واحد بيكلمنى بيقولى جهز مبلغ 70 ألف جنيه وهنيجى نخادهم منك من البلد علشان هما خاطفين ابن اخويا وطالبين المبلغ ده علشان يمشوه وقفلوا التليفون، وبعد يوم اتصلوا على اخويا أحمد عبدالواحد وقالوا لية ادفعوا الفلوس علشان ابنك ميموتش، وبعد كدة رجعوا كلموني وقالوا انهم هيستلموا الفلوس ف القاهرة وانتظرنا تليفون تانى واتفقت معاهم انهم يتابعوني بالتليفون لحد ما تقابلنا في القاهرة مع واحد اسمه مينا شغال سائق تكس وكان معانا واحد تانى اسمه عبد النبي اخوه مخطوف طلبوا منه 70 ألف جنيه.
ويوميها تقبلنا مع مينا واديناه 70 ألف جنيه وعبدالنبي اداه 70 ألف جنيه، وبعدين كلم حد وقاله أن المبلغ إلى وصل ليا نحو 140 ألف جنيه ومينا قال أن في ناس جايه وهتدفع مبلغ 220 ألف جنيه عن 3 مخطوفين ف ليبيا، وبعدين قالنا تصبروا يومين تلاته وهما هييجو وقولنا هنبلغ القسم بعد مايوصلو علشان نحاول نرجع الفلوس إلى دفعناها فدية واتفقنا مع مينا أن مفيش حاجه تحصل للناس المخطوفة وانهم مش هيجوا جثث ويوم 20-5 اتصلنا على رقم ابن اخويا في ليبيا ورد علينا الشخص إلى خاطف العيال وطلبنا انهم يكلمونا وبعدين سألناهم إذا كانت الفلوس وصلت ولا لا قالوا اه وصلت ومنتظرين عربية علشان يرجعوا مصر ويوميها كلمنا اولادنا واطمنا عليهم، وقالو أن صحتهم كويسه وقالو انهم مستنيين العربية وبعد كدا قالو أن العربية عطلت ومعرفناش نكلمهم تأنى والكلام ده حصل يوم 29-5 وتقابلنا مع مينا ف شارع الميرغني بمصر الجديدة.
س: ما اسم قريبك المخطوف في ليبيا ؟
ج: اسمه أحمد محمد عبد الواحد عنده 25 سنة وشغال كهربائي
س: كيف علمت بخطفه واحتجازه؟
ج:واحد اسمه أحمد كلمني وقالي إنه مخطوف.
س: ما هو مضمون الحوار الذي دار بينك وبين المدعو أحمد؟
ج: هوا قالي جهزوا مبلغ 70 ألف جنيه وهنيجى ناخد الفلوس منك وبعدين كلموني تانى وقالو انهم هيستلمو الفلوس في القاهرة واتنظرو تليفون تانى وبعدين اتفقوا انهم هيتبعونى في التليفون وبعدين قابلت واحد اسمه مينا ف القاهرة وادانى رقمه.
س: من تتهم تحديدا بارتكاب الخطف؟
س:مينا مسعود ومصطفى فرج وناس تانية معرفهمش
س: مين الذي طلب منكم مبلغ لا طلاق سراح ابن اخوك؟
ج: اللى طلب المبلغ واحد اسمه أحمد ف ليبيا وقالي روح اديهم لمينا والمبلغ كان سبعين ألف جنيه
س:هل كان ذلك عن تهديد؟
ج: ايوة هما هددوني بقتل ابن اخويا لو مدفعتش الفلوس.
س: هل دار بينك وبين المدعو مينا حوار؟
ج: اديته 70 ألف جنيه وعبد النبي اداله 70 ألف جنيه كمان وبعد كدا مينا كلم واحد وقاله أن الفلوس وصلت واستلمها وبعدين عرفنا أن في ناس تانية جايه ب 210 ألف ومينا اخد مننا الفلوس يوم 22 يونيو
وتواصل النيابة التحقيق في الواقعة
س:اسمك وسنك وعنوانك؟
ج: اسمي مروه محمود محمد، ربة منزل، الزرقا دمياط.
س: ما معلوماتك عن الواقعة محل التحقيق؟
ج: إلى حصل أن من شهر تقريبا جالي تليفون أن جوزي اتخطف ومطلوب مبلغ 70 ألف جنيه علشان يسيبوه يرجع مصر وقالوا أن تسليم الفلوس هيبقا في القاهرة عند الدائري وبعد كدا كلموني وقالوا هنستلم الفلوس عن طريق ايداع في حساب ف ليبيا وبعد كده قالوا عن طريق واحد تونسي في مصر بعد كدا عرفت أن العصابة اتقبض عليها وجيت علشان أبلغ بالي حصل.
س: ما اسمه وبياناته تحديدا؟
ج: اسمه مصطفى على على عوض عنده 35 سنه وشغال في ورشة المونتال في ليبيا من 3 سنين
س:كيف علمتى بواقعة احتجاز المدعو مصطفى؟
ج: واحد اسمه أحمد الليبى كلمنى وقالى أنه مخطوف
س: ماهو الحوار الذي دار بينك وبين المدعو أحمد الليبى تحديدا؟
ج: هو قال جهزو 70 ألف جنيه ووصليهم مره في الدائرى في القاهره ومره في حساب في بنك ف ليبيا ومره لواحد تونسى في مصر
التحقيق مع المتهمين
فتح المحضر بتاريخ 23 /6/ 2016 بسرايا نيابة أول مدينة نصر بمعرفة وكيل النائب العام كريم حنفي ومصطفى اشرف سكرتير تحقيق، حيث عهد الينا رئيس النيابة المستشار محمد حتة بالتحقيق مع كل من مصطفى فرج بشير وعلاء عمار سلامة ومينا مسعود جاد الرب، محمد أحمد عبد السلام، محمد ابرهيم فارس ومحمد عبد الله عبد الناصر،سالم أحمد
س: ما اسمك؟
ج: مينا مسعود جاب الرب
س: ما الذي حدث إذا وما هي ظروف عرضك علينا ؟
ج: اللي حصل انا شغال سواق تاكسي وبروح فندق سيتي ستار واعرف ناس ليبيين كتير واحد اسمه علاء عمار قالي انا اديت رقمك لواحد اسمه مصطفى هيكلمك ويطلب منك حاجات وانا قولت عليك انك شخص أمين وانا بثق فيك وبالفعل مصطفى كلمني قالى انا من طرف علاء وانا ليبي الجنسية كنت عايزك تجبلي بعض الحوالات وتوصلها لناس وبالفعل انا قولت لية ماشي وهوا أول مره طلب منى اجيب مبلغ 5000 دولار من نحو شهرين من طنطا ولكن انا علشان مقدرش اروح المشوار كله لواحدي بعت واحد اسمه محمد جاب معايا الفلوس ووصلهم لمصطفى واخدت اجرة المشوار وابتدئ يطلب منى كذا مره حوالات مره 90000الف مره 50000الف وف مره طلب منى انى اجيب حواله قدرها 50000 جنييه من إسكندرية وانا علشان المشوار بعيد عليا بعت واحد قريبي اسمه ديفيد وهوا راح إسكندرية قابل شخص اسمه ماهر اداله 50 ألف جنيه وبعدين فوجئت باتصال بيقولى انتا ديفيد قولتله في حاجه يعنى قالي لا انا كنت عايز احكيلك على قصة الـ 50 ألف جنيه وراح قال ليا انا فوجئت بديفيد جاي معاه ابنه الصغير علشان كدا انا هحكيلك انا ابنى مفقود من يوم 23-4-2016 ففوجئت باتصال يوم 18-5 -2016 من ليبيا بيقولى لو عايز ابنك ادفع 50 ألف جنيه لشخص هنبعته ليك، فرحت انا قلت لية طيب بلغ البوليس قالى انا بلغت غيابى ولما حسيت أنه خايف يبلغ رحت انا رايح على قسم أول مدينة نصر تقريبا يوم 24-5 علشان أبلغ عن إلى اننا سمعته.
وهناك انا قابلت الرائد أحمد قدري وهوا ادانى رقم تليفونه علشان لو في أي تعامل تأنى أبلغه وبالفعل يوم السبت كلمني شخص تقريبا اسمه أبو النجا عايز اقابلك ف أمانه عايز اديهالك قولتله انتا مين قالى انا من طرف أحمد الليبى وفوجئت باتصال من أحمد الليبى قالى ادى الفلوس دي لمصطفى وبالفعل روحت قابلت الناس وقعدت اتصل بأحمد قدري اكتر من ساعه وهوا موبايله مش بيرد، فخفت على نفسى اروح لمصطفى واديته الفلوس وبعد كدا وانا واقف عند سيتي ستار كلمت العميد نشأت بطرس وقولتله على القصه راح واخدني وطلع بيا على قسم أول مدينة نصر وقعدت انا مع أحمد قدري تأنى وهوا دخل لرئيس المباحث بس اتضح انى كنت واخد رقم تليفونه غلط وادانى رقمه الصح وقالى المره الجايه تكلمنى ومتروحش تستلم حاجه تانى من غيرى وانا معاك.
وأضاف المتهم وبعدين كلمني أحمد الليبي وقال ف واحد هيكلمك تروح تاخد منه 70 ألف جنيه كلمت أحمد قدرى قالى في ضابط اسمه أحمد هينزل معاك علشان يجيب الناس دى وبالفعل نزل معايا ضابط وكان معاه 4 أمناء شرطة وروحنا عند المقاولين العرب وقابلت سعيد إلى هيدينى ال 70 ألف جنيه وادانى الفلوس وراح داخل علينا الظابط والأمناء مسكوه هوا وال معاه وقالى هنطلع على مصطفى نجيبه وبالفعل كلمنا مصطفى وقولناله انزل احنا معانا الفلوس ونزل وهاو كان معاه اتنين تانى روحت سلمت عليه راح داخل علينا الظابط ومسكنا كلنا وبعد كدا الضابط اخد مصطفى نزل بيه وراح خلاه يكلم علاء عمار بعدها ب 10 دقايق لقيت الظابط مسك علاء عمار ومعاه 2 كمان وطلع بينا كلنا على القسم
س: ماسمك وسنك وعنوانك وماهى جهة عملك؟
ج: اسمى عبدالناصر سالم السن 49 سنه ليبى الجنسيه صاحب شركة استيراد قطع غيار سيارات
س: ما قولك في ما هو منسوب اليك بانك متهم باحتجاز ىالمجنى عليهم المبين اسمائهم بالأوراق بدون أمر من أحد الحكام الختصين بذلك وفى غير الأحوال التي تطرح فيها القوانين واللوائح على ذوى الشبهات وذللك على النحو المبين بالأوراق؟
ج: محصلش
س: ماقولك في ماهو منسوب اليك بانك متهم بالتهديد لأهلية المجنى عليهم شفويا بواسطة شخص آخر بارتكاب جريمة ضد النفس والمال؟
ج: محصلش
س: ماقولك في ماهو منسوب اليك بانك متهم بالحصول بالتهديد على المبلغ المبين بالأوراق من أهل المجنى عليهم المبين اسمائهم بالأوراق على النحو المبين بالتحقيقات ؟
ج: محصلش
س: ماالذى حدث إذا وما ظروف عرضك علينا ؟
ج: اللى حصل انى بقالى في مصر شهرين كنت عايز اشترى شقه عرفت واحد اسمه فارس من نحو 3 أيام ليبى الجنسيه وقالى تعالى قابلنى انا واحد تانى اسمه علاء وهنرجعك الشقه اللى انتا عايزها وأول ماركبت معاهم ومشينا فوجئت بالأمن بيوقفنا وقبضو علينا وطلعو بينا على القسم ومن ساعتها وانا ف الحجز وانا معرفش انا متهم بايه اصلا
س: متى حدث ذلك؟
ج: الكلام ده حصل يوم 31-5.
س: ماسبب تواجدك بالزمان والمكان سالف الذكر ؟
ج: انا كنت رايح اقابل فارس علشان عايز اشترى شقه.
س: من كان برفقتك انذاك؟
ج: انا كنت لواحدى
س: من القائم بضبطك تحديدا وكم عددهم ؟
ج: هما نحو 3 لابسين ملكى
س: ماسبب قيامهم بضبطك ؟
ج: هما قالو هنحقق معاك وتمشى
س: هل القائم بظبطك قام بتفتيشك ؟
ج: ايوة
س: ما الذي أسفر عن ذلك التفتيش ؟
ج: هما اخدو الموبايل بس
س: ما علاقتك بكل من علاء عمار وفارس محمد وهل يوجد سابق خلاف بينكم ؟
ج: انا معرفش علاء خالص لكن فارس اعرفة قبل الواقعة بيومين عشان هيجيب ليا شقة اشتريها
س: ما علاقتك بكلام مصطفى فرج ومينا مسعود ومحمد عبد السلام وهل يوجد سابق خلافات بينهم ؟
ج: انا معرفهمش
س: ما سبب تواجدك داخل جمهورية مصر العربية ؟
ج: انا عندي شغل مع شركة عربيات في مصر وانا شغال في استراد العربيات
س: منذ متي وانت داخل جمهورية مصر العربية ؟
ج: من شهرين
