رسالة شديدة اللهجة لـ«الشربيني» من بطل صورة الثانوية العامة
وجه ناصر سيف، طالب الثانوية العامة صاحب الصورة التي التقطها الزميل محمد متعب، والتي يظهر فيها وأفراد قوات الأمن يطاردونه أثناء فض مسيرة الطلاب أمس، رسالة إلى الدكتور الهلالي الشربيني، وزير التربية والتعليم قال فيها: «أنت وعدت وماوفتش فماتنتظرش مننا إن إحنا نصدقك في أي حاجة».
وأوضح أن وزارة التربية والتعليم لو متأكدة إن هي هتقدر توفي بأي وعد.. كانت وفت بوعدها لما قالت إن الامتحانات مش هتتسرب تاني، والامتحانات لآخر مادة حتى الآن بتتسرب والدليل امتحان الدين اللي اتأجل بسبب إنه تسرب تاني».
أكد أنه تم القبض على عدد من زملائه أثناء فض وقفتهم بالأمس أمام وزارة التربية والتعليم، وجميعهم تم إخلاء سبيلهم على الفور باستثناء اثنين ما زالا قيد الحبس في انتظار عرضهم على النيابة العامة وهما الأخوان نصر وأحمد عماد.
ووجه «ناصر» حديثه للمسئولين قائلًا: «أنا عايز أسأل ليه زمايلنا يتقبض عليهم ويتعمل فيهم كده.. هما تهمتهم إيه؟، أنا عايز أفهم: طالب نازل بيطالب بحقه تهمته إيه؟، عايزينا نمشي وما نقفش وما نتظاهرش خدوا ناس مننا يقابلوا الوزير، وخلوه يورينا تنفيذ القرارات».
وعن الصورة التي تم التقاطها له بالأمس من قبل الزميل محمد متعب، قال: «الصورة فرقت جدًا معايا ومع الناس.. خلت صوتنا يوصل لكل العالم، وأنا مش خايف من أي حاجة زي ما ناس كتير بتكلمني وبتحذرني وتقولي خد بالك من نفسك.. طول ما أنا على حق هفضل مش خايف من أي حاجة».
يذكر أن سيف ناصر، هو صاحب الصورة التي التقطها الزميل محمد متعب بالأمس، والتي تظهر مطاردة قوات الشرطة له أمام وزارة التربية والتعليم لمنعه من الاعتراض على الفوضى التي تشهدها امتحانات الثانوية العامة التي فشلت الدولة في السيطرة عليها بسبب التسريبات وإلغاء الامتحانات وآخرها امتحان مادة "الديناميكا".
