الطلاب يسخرون في «الثانوية العامة هتخلص إمتي».. محمد: مش هتخلص البقاء للأقوى.. نسمة: هتخلص علينا.. محمد: مش راضية تموت عاملة زي البرص.. يوسف: شكلها هتفضل محشورة.. وسلمي: دفعتنا واخدة إقامة د

حالة من "الزهق" والضجر المشوب بالسخرية انتابت نشطاء مواقع التواصل الاجتماعي "فيس بوك وتويتر" من طلاب الثانوية العامة، بسبب عدم انتهاء امتحانات الثانوية العامة، والتي كان مقررا لها الانتهاء منذ عدة أيام مضت، لكن تم تأجيل امتحانات عدة مواد لتنتهي الامتحانات مع نهاية شهر رمضان، ما دفع نشطاء مواقع التواصل الاجتماعي لتدشين هاشتاج ساخر بعنوان "الثانوية العامة هتخلص إمتي"، حقق مركزًا متقدمًا على تراند مصر بتويتر، حيث سخر الطلاب من عدم انتهاء امتحاناتهم حتى الآن، رافعين شعار "الثانوية العامة ذهاب وعودة".

البقاء للأقوي

قال محمد موافي: "مش هتخلص، البقاء للأقوى يا جماعة! الثانوية العامة هتخلص إمتي".

وأضاف نسمة محمد: "هي مش هتخلص ده هي اللي هتخلص علينا".

وعلقت نهير: "قبل العيد.. بس الله أعلم العيد سنة كام.. الثانوية العامة هتخلص إمتي".

ورد محمد رشاد: "هي مش ناوية تخلص يا فندم غير لما تجيب أجل العيال.. الثانوية العامة هتخلص إمتي".

وتابع أشرف سليم: "دي ذهاب وعودة يا أبو صلاح.. الثانوية العامة هتخلص إمتي".

فوقوا بقي

وقال محمد عاطف: "الثانوية العامة هتخلص إمتي مش راضية تموت بنت... عاملة زي البرص".

وأضاف آية:"الدفعة دي عليها غضب ربنا.. الثانوية العامة هتخلص إمتي".

وعلق فاطمة:"الثانوية  العامة هتخلص إمتي مش هي اللي هتخلص إحنا اللي هنخلص".

ورد عمر ربيع: "يا جماعة فوقوا بقي الاعتراض بقي بالنسبة لينا هاشتاج وكوميكس هما عايزنا نفضل كده علشان ميسمعوش صوتنا.. الثانوية العامة هتخلص إمتي".

وسخر يوسف الكامل: "الثانوية العامة هتخلص إمتي الدفعة دي شكلها هتفضل محشورة في ثانوية عامة ٤ أو ٥ سنين كمان مش عارفين يخلصوها".

هتخلص علينا
وقال باسيسا:"الثانوية العامة هتخلص إمتي يا عم إحنا ورانا حاجة".

وأضاف مصطفى على: "الثانوية العامه هتخلص إمتي هي اللی هتخلص علینا أقسم بالله".

وعلق حسام متولي:"وانت رايح تخطب اسأل لو لقيتها دفعة 2016 خدها وانت مغمض صبورة وهتستحملك ومستعدة لأي مفاجآت.. الثانوية العامة هتخلص إمتي".

ورد محمد أحمد: "والله انا بقول لما إكرامي يعتزل والحضري يرجع الأهلي تاني.. الثانوية العامة هتخلص إمتي".
وسخرت أميرة: " نام بس انت دلوقتى ونبقى نمتحن كلنا مع دفعة 2017 انا وانت وبابا وناهد وكلنا.. الثانوية العامة هتخلص إمتي".

وتابع أحمد جانو: "الثانوية العامة هتخلص إمتي.. ثانوية إيه اللى بتخلص يا سامية؟!!".

إقامة دائمة
وقالت سلمي محمد: "الثانوية العامة هتخلص إمتي إحنا دفعتنا واخدة إقامة دائمة".

وأضاف أحمد سليمان: "ما المرة اللي فاتت قلتلي هتخلص 29 برضه وهفضل مزنوق لحد 4/7 اهو شوفوا لي حل.. الثانوية العامة هتخلص إمتي".

وعلق أحمد أبو العينين: "الثانوية العامة هتخلص إمتي.. لما شعري يبيض وسناني تقع وأموت".

ورد ممدوح على "الثانوية العامة هتخلص إمتي.. أنا حاسس إني هاموت قبل مااخلص الثانوية يامعتز".

وتابع عمرو ياسين: "الثانوية العامة هتخلص إمتي الدفعة دي اتظلمت والله أنا مجرب الإحساس ده، من سنتين حصل نفس الكلام في الأزهر وعادوا لنا 3 مواد وبرضه في رمضان".