غضب معلمي حلوان بسبب تأجيل امتحانات الثانوية العامة
أعرب عدد من معلمى المدارس بمنطقة حلوان، عن استيائهم الشديد بسبب تأجيل الامتحانات لطلاب الثانوية العامة.
وقال محمد مصطفى، مدرس رياضيات بحلوان: "بعد تأجيل الامتحانات لا بد أن نفكر بهدوء.. الكل يعلم أن أكتر طلبة مظلومة هم طلبة علمى رياضه سواء في كم المناهج أو ضغطه الجدول بتاع الامتحان، لازم نبص للجزء المليان في الكوبايه".
وأضاف: "تعالى نتخيل الآتى: «كل الطلبة قبل الامتحانات كانت بتقولى ينفع كده يامستر الديناميكا بكل مشكلاتها قدماها يومين بس والله حرام والله ظلم فرديت عليهم وقلت لهم أمال أنتوا عايزين أيه قالوا ساعتها: عارف يامستر لو قدمها 4 أيام مثلا والله هنقفلها وياسلام يامستر لو في امتحان تجريبى كده علشان نتدرب على الامتحان وطريقته أهو سبحان الله ما تمنتوه استجاب الله له، الامتحان بقى قدامه 8 أيام مش أربعه، الامتحان اللى كان نفسكوا الوزارة تعمله عملتوا ليكم بكل مواصفات الامتحان الكبير مش كده وبس ومراقبين ونفس الجو وكمان مش هتتحاسبوا على الدرجات».
فيما قال أحمد جلال، مدرس لغة عربية: «لا بجد حرام.. ايه اللى بيحصل ده من الوزارة هما يبيعوا الامتحانات وإحنا نشرب القرف كله في المراقبة واللجان، أنا مش هاعمل مراقبة حتى لو حصل ايه ها يخصموا يخصموا، شئون قانونية تبع الوزارة وايه يعنى وزارة فاسدة».
