انتفاضة إلكترونية ضد «وزير التعليم» بعد تأجيل امتحانات الثانوية.. ياسمين: «يا شيخ راعي ربنا فينا».. سارة:«امشى».. حسن: «انت فاشل».. على: «يا وزير شيكا بيكا

حالة من الاستياء والتوتر المتصاعد انتابت نشطاء مواقع التواصل الاجتماعي "فيس بوك وتويتر" بسبب تسريب امتحانات الثانوية العامة وإلغاء امتحان الديناميكا وتأجيل عدد آخر من الامتحانات، ما دفع النشطاء لتدشين هاشتاج "قول كلمة لوزير التعليم" يطالبوه فيها بالاستقالة ومغادرة الوزارة، وواصفين النظام التعليمي والحكومي بالفاشل.

التسريبات
قالت ياسمين محمد: "قول كلمة لوزير التعليم.. راعي ربنا في بتوع الثانوية هما ليهم أهل تعبانين مش عشان مش قادر تسيطر على التسريبات تطلع عين أهاليهم كده يا أخي"، وأضافت إسراء محمود: "نظام التعليم في مصر نظام فاشل، فبأي حق عايزين شباب متعلمة وفاهمة تستغل تعليمها لمصلحة بلدها أصلحوا التعليم أولا.. قول كلمة لوزير التعليم".

وعلق حسن أحمد حسن: "انت فاشل وجاهل واللى جابك فاشل..."، وردت آلاء الصغير:"هقولك إيه فطرت عليك امبارح مش هضيع صيامى عليك تانى بس حسبنا الله ونعم الوكيل".

وتابعت إيمي مصطفى: "انا رأيى نبدل كلمة ف المشمش ونخليها لما 3 ثانوي تخلص امتحانات".

امشي
وقال أحمد حسين "ماذا أقول وأي كلام يقال بعد كل ما قد قيل"، وأضافت آنسة زئبقة: "لوزير ده أو اللي قبله أو اللي بعده تغيرهم مش هيفرق حاجة دي سياسة دولة بتقول قضاة وشرطة وفن ومش مهم تعليم وصحة".

وعلقت سارة محمد "امشي.. "، وتابع كريم: "أو يقولك وزير التربية والتعليم يستقيل بعدها بيومين، تعيين وزير التربية والتعليم السابق مستشارا لرئاسة الجمهورية".

شيكا بيكا
وقال أحمد الزناري: "يعنى وزير تعليم مابيعرفش يكتب وعنده غلطات إملائية كارثية مستنين إيه يحصل غير كده"، وأضاف هبة البدري " مش هتورد على جنة ولا على نار".

وعلق على نصار:"يا وزير شيكا بيكا مش هنعيد الديناميكا"، ورد سامح المرشدي: "التسريبات مقصودة لخلق حالة من الاضطرابات يليها خطوات نحو تحجيم التعليم الجامعي الحكومي وتشغيل الجامعات الخاصة".

وتابعت إسراء منجي:" خد حاجتك واخلع يا عم الحاج كفاية اللي عملته ف العيال لحد كدا"، وقال جون بشري:"أول حاجة وزارة ضعيفة يعني لما تأجلوا الامتحانات مش هتتسرب روح يا أبو 50%".