رامي جمال يدعم تامر حسني بعد تسريب ألبومه
عبر المطرب رامي جمال عن استيائه لتسريب ألبوم الفنان تامر حسني، مطالبًا جمهوره ومحبيه بسماع الألبوم عن طريق القناة الرسمية لتامر حسني عبر موقع الفيديوهات الشهير "يوتيوب".
وكتب رامي عبر صفحته الشخصية على موقع التواصل الاجتماعي "فيس بوك": «أكتر شيء محبط ومؤذٍ ومتعب لأي فنان أو أي إنسان عادي حتى أنه يشوف مجهوده وتعبه وإنتاجه وإخلاصه موضع استهتار واستخفاف وإهمال والأصعب أنه يكون من ناس قريبة منه والمفروض أنها أمينة على شغله ومجهوده، الضربة اللي مبتموتش بتقوي وخصوصا لما اللي ياخد الضربة أصلا قوي».
وتابع: «اللي حصل مع صديقي وأخويا "تامر حسني" من استهتار في التعامل مع شغله ونتج عنه تسريب الألبوم قبل معاده موضوع محتاج وقفة كبيرة وإعادة ترتيب أولويات وحسابات، بس في الآخر نحمد ربنا على اللي حصل وتامر أقوى من الهزة دي».
وأضاف: «اللي نقدر كلنا نعمله إننا ندعم فديوهات الاغاني من على قناة تامر حسني الرسمية لحين طباعة الألبوم ونزوله في السوق وأرجو من الجميع وخصوصًا اللي بيحبوني أو متابعيني أنهم يشتروا السي دي الأصلي فور نزوله، وده دعم لفنانك المفضل عشان يقدر يستمر في أنه يقدملك المنتج اللي بتحبه، وأرجو المشاركة بالهاشتاج ده #ادعم_تامر».
