شلاليت عم فريد
رمضان كريم ربنا يفتح قلوب الناس
لكل شيء فيه معاني الرقة والإحساس
ونفتكر ربنا بالتــقوى والإخلاص
ونتوب إلى الله ونرجع للعمل بحماس
رمضان كريم.. الصيام في كل عام معناه
نكون بشر مؤمنين نخلص في ذكر الله
ونقول مافيش في الحياة غير العمل نرعاه
ورحمتك يا إله الكون في كل صلاة
الصوم عبادة ورحمة وموعظة وإحسان
وترجمة للمعاني السامية في الإنسان
فيه الخشوع والخضوع للواحد الديان
يارب اقبل صيامنا.. ارحمنا بالغفران
يامصر رمضان كريم وربنا أكرم
وربنا يتوب على العاصي إذا أقدم
وتاب إلى الله وقال مافيش لنا مغنم
سوى رضا ربنا الواحد الأعـظم
يارب تكرم وطنا بالسلام والحب
وتجمع الشعب في وحده تسر القلب
ويكون صيامنا شفاء من كل كرب وذنب
والكل يرجع يقول.. اقبل عملنا يارب
رمضان كريم فكروا فيه يوم حساب وعقاب
والدنيا فانيه وآخرتها مافيش ألقاب
ولا مناصب ولا سُلطة ولا إعجاب
فتوب إلى الله وقول.. إقبلنا يا تواب
