استياء طلاب الثانوية من أداء الامتحانات في رمضان.. رحمة: «بنفكر في الأكل أكتر من الأسئلة».. أحمد: «مبنعرفش نشتم اللي حاطط الامتحان».. ميرنا: «مش حاسة بطعم الشهر».. ومحمد:
عبر مستخدمو موقع التواصل الاجتماعى «تويتر»، عن استيائهم من أداء امتحانات الثانوية العامة خلال شهر رمضان المبارك ومن تسريب الامتحانات، من خلال هاشتاج دشنوه خصيصا لذلك، اليوم الخميس، حمل عنوان «مشكلة الامتحانات في رمضان»، ومن جانبها رصدت «فيتو» بعض التعليقات.
«اختم القرآن»
قالت رحمة سعيد: «الواحد بيفكر في الأكل أكتر ما بيفكر في الأسئلة»، وأضاف أحمد خالد: «مبنعرفش نشتم اللي حاطط الامتحان بعد مانخلص علشان بنكون صايمين»، فيما قال زايد عرابى: «ببقى نفسي اختم المنهج مع أن الطبيعي أني اختم القرآن»، وتابع ميدو قائلا: «الواحد بيبقي مش مركز في حاجة خالص».
وغرد محمد فكرى قائلا: «إن التركيز بيبقي صعب وأنت صايم وغير كدا الجو حر»، وقالت ميرنا محمد: «مش حاسة بطعم رمضان بسب الامتحانات»، وأضاف نور الدين: «التعليم قبل التربية..علشان كدة هي مش أزمة تعليم هي أزمة تربية.لأن الغش والتسريب ده دليل على أزمة أخلاق وضعف نفس».
«هنسقط»
وقال محمد جمعة ساخرا: «حضرتك انا بجوع وانا بذاكر ولازم ادخل اطمئن على المطبخ كل شويه وبالتالي مش هذاكر في رمضان وبالتالي هنسقط»، فيما قال محمد محمود: «ياجدعان والله انتوا مكبرين الموضوع كل ده علشان مش عايزين تذاكروا في رمضان وعايزين تتفرجوا على المسلسلات».
وغردت بنت الحاج أشرف قائلة: «مافيش وقت نذاكر فيه يا جدعان قبل الفطار مافيش تركيز المغرب يأذن نفطر.. وهوب دابل كيك الفجر أذن ولازم نصوم تاني يوم»، واستنكر عمرو على تسريب الامتحانات قائلا: «ناس تبقى في حاله زى الزفت عشر شهور وفى الآخر واحد تافه يسرب الامتحانات والفاشل ينجح لا برافوا».
