طلاب الثانوية العامة يتمردون على الوزارة و«شاومينج».. النوبية: مش هنسكت.. محمود: إلغاء الامتحانات والتنسيق.. دوكا: أنا مش عارف أحفظ.. خالد: عشان كل واحد ياخد حقه.. سارة: لازم نغير البلد دي

 
قدرات
قالت النوبية: "طلاب تمرد ثانوية.. إلغاء التنسيق وتفعيل امتحان القدرات.. صوتنا هيوصل!.. مش هنسكت زي الدفعات اللي فاتت.. ذنبي إيه إني أقعد أدح طول السنة وييجي واحد يغش الامتحان كله؟ ويدخل كلية أحسن وأعلى مني؟ ودا كله تحت مسمى التنسيق؟".

وأضاف يوسف الصاوي "امتحان القدرات"، ومحمود الشامي "إلغاء الامتحانات وإلغاء التنسيق"، وعلق إبراهيم بيه: "يا جدعان لو موقفناش دلوقتي مش هنقف تاني!!".

ورد دوكا موسى "أنا مش عارف أحفظ!.. طلاب تمرد ثانوية.. حكاية التنسيق بالنسبة ليا عاملة زي حكاية على بن الجنايني بالظبط".

وتابع مؤمن هشام "يالا يا جدعان في لعبة قذرة... بتحصل شاومينج بيلعب مع الوزارة ومتعادلين 1:1 يالا ننكد عليهم ونلغي الماتش خالص.. طلاب تمرد ثانوية.. بلاش طاقة سلبية يا جدعان والله غيرنا حاجة كان بها مغيرناش مش أول مرة يعني".

دروس وقرف
وقالت دنيا عيد "نمتحن طيب الأول.. وبعدين الغوها.. في ناس طلع عين أهلها من أول السنة ودروس وقرف.. طلاب تمرد ثانوية".

وأضاف خالد جدي "طلاب تمرد ثانوية.. إلغاء التنسيق ودخول الكليات بالقدرات عشان كل واحد ياخد حقه ميجيش الحرامي يبقي دكتور والمفروض يبقي دكتور ميلاقيش إلا تجارة".

وعلق ضياء "أساتذة كتير قالت عليا إنى مخى مخ طب.. بس للأسف مش هدخل عشان مش بحب أحفظ.. طلاب تمرد ثانوية".
ورد محمود البناوي "طلاب تمرد ثانوية.. تعليمنا فاشل".

وتابعت نور "طلاب تمرد ثانوية.. شاركوا يمكن مانغيرش لينا نغير للي جاي".

امنعوا الغش
وقالت سارة سوسكا "طلاب تمرد ثانوية.. لازم نغير البلد دى".

وأضافت نور على "الغوا التنسيق والتوزيع الجغرافي اللى ضيعونا.. طلاب تمرد ثانوية".

وعلق الشرقاوي "طلاب تمرد ثانوية.. عاوزين نظام قدرات عشان الطلاب كلها متتظلمش وكل واحد يدخل في المكان اللي يقدر يسد فيه متبقاش بكوسة التنسيق".

وتابعت رانيا رانيا "الدولة مش مهتمة ولا هتهتم أبدا بالتعليم لو اتعلمنا كويس هنفهم وهما مش عاوزين كدا.. مينفعش يلغوا التنسيق كده كل العيال هتدخل طب وهندسة برة بيدخلوا الأقسام على حسب الموهبة والمهارة والقدرة امنعوا الغش وأنا راضية.. طلاب تمرد ثانوية".