«أصل الحكاية.. بلد» قصيدة جديدة للشاعر محمد عطا
منين أجيب ناس
لمعناة الكلام فاهمين
شبه الحبايب
إذا شافوا العدا فاهمين
بعت ناسي لناسي
يعرفو ناسي
جعلت نسمة صباحي
لكل ناس فاهمين
يا ليل يا عين
يا شعب يا نايمين
يا صبري على بلوتي
يا قلب كل حزين
حزن الكلام معلوم
والعارفين عارفين
حزين كلام الجريح
والحاضرين فاهمين
آه يا زمن الخنا
يا دولة المبصوص
فيكي الفقير اتهدى
وقلعوه بلبوص
جبنا المتعوس من هنا
وعلقنا عنده فانوس
عيان بيركب ميت
يا حزني ع الفاهمين
ركب زعيم العيا
ع العشق والمعشوق
على ضهر إيده التنا
ورافع دماغة لفوق
عيش عياله ف هنا
وباقي الرجال في شقوق
مين تحت حكم العيا
يسأل نقول فاهمين
يا اللي بنيتوا المساجد
لأجل ما تبقو شيوخ
دعاكو ماله إجابة
ويوماتي كلامكو يبوخ
يسمع كلامكو فقير
وهو جعان مسلوخ
طيب جيبوله كفن
من عند ناس فاهمين
كل الحكاية بلد
عايقة ومؤذية
بين البلاد مسخرة
ومكبرة اللية
ملهاش علاقة بناس
وبتسوء النية
معروفة من وصفها
وكلنا فاهمين
صالح من جحيم الجهل
عالم وبشهادة
ملكك يدوم يا فتى
وتملي ف زيادة
اعشق كمان للعلم
هتكتسب لإفادة
وعرف جميع كتبك
لأجل ناس فاهمين
عوازل بيقولوا حكم
وأنت بتسمع ليهم
شيوخ وراكبة سيوخ
والذل باين فيهم
وشباب عليه العوض
وربك بيلطف بيهم
واسأل سؤال متجاوب..
يردو أكيد فاهمين
