جوعوا تصحوا!
مع قدوم شهر رمضان لجأت الحكومة للحفاظ على ضغطك وسكرك علشان متلغبطش كتير، يعني أزمة الأرز إنجاز كبير في حكومة إسماعيل؛ لأننا كلنا عارفين أضرار الأرز فهو يؤدي لأمراض كثيرة منها ارتفاع ضغط الدم وارتفاع السكر وزيادة السمنة ويجعلك قليل الحركة، فلذلك كانت أزمة الأرز لصالح المواطن المصري عامة والغرباوي خاصة وعلشان كده رفعت الحكومة شعار الحكومة "جوعوا تصحوا".
أما عن الفراخ فهي أيضًا لا فائدة لها، فالفراخ البيضاء لا ليها طعم ولا ريحة عشان كدة حكومة إسماعيل أكدت أضرارها وظهر موت جماعي من مرض مجهول وتطعيمات مضروبة وتحصينات فاسدة، فلذلك ارتفعت أسعارها إلى 27 جنيها الكيلو وبكده الفرخة حتوصل إلى 50 جنيها وأكيد المواطن الغلبان مش حيقدر يشتريها وكده نجحت الحكومة في عدم وصول الفراخ للغلابة وتبقى صحتهم في أمان وبكده "تجوعوا تصحوا".
أما بقا اللحمة بتاعة الغلابة، فخلاص الأمر منته خوفًا على صحة الغلابة، فالمستورد كله ارتفع سعره عشان يضمنوا أن ميوصلش للغلبان؛ لأنه لو أكل مستورد حتلاحقه كل الأمراض لأن مفيهاش فايدة ومش مدبوحة شرعي، فعملت الحكومة على عدم وصولها للغلابة عن طريق زيادة أسعارها وبكده يبقى ضمنت أن الغلابة حتعيش بسلام ومش حيموتوا من اللحوم المستوردة لعدم قدرتهم على شرائها واستمرارا للحفاط على الغلابة ده كان الإنجاز الثالث قبل دخول شهر رمضان في التصدي لكل من يقترب لصحة الغلابة بمصر.
وختامًا نداء من الغلابة اللي أنا منهم لكل المسئولين أنتم عملتم كل حاجة من أجلنا ياريت بقى ترجعوا لينا كل حاجة و"إحنا راضيين".
"راضيين" بأن الأرز يتعبنا ويجبلنا الضغط والسكر والسمنة بس يبقى بـــ3 جنيهات والفراخ يكون فيها كل الأمراض بس تبقى الفرخة بـ17 جنيهًا واللحوم المستوردة اللي فيها العبر ناكلها ونموت بس تبقى بــ30 جنيها و"إحنا راضيين".
علشان ربنا عمره ما حيرضى عليكم وكلكم بتشاركوا في مجاعة جماعية دون حسيب أو رقيب.
