فتاة تطلب من «عمرو دياب» تصوير كليبه الجديد مع موديل محجبة
يسعي البعض من خلال التوجه بطلب لشخص مشهور أما لتحقيق حلمه وللشهرة أو للعمل، وذلك ما قامت به آية علاء، التي تقيم بالمنصورة، وطلبت من الفنان عمرو دياب أن تكون في كليبه الجديد فتاة محجبة كـ "موديل"، مؤكدة أن ظهور فتاة محجبة في كليب عمرو دياب سيزيد من نسبة الفتيات المحجبات، ووصفت عمرو بأنه "هو اللي بيطلع الموضة في أي كليب".
وكتبت "آية" تدوينة على موقع التواصل الاجتماعى "فيس بوك": "بصوا هيا مجرد فكرة جات في دماغي ونفسي تلف فيس بوك كله وتوصل لعمرو دياب.. كلنا عارفين إن طبعا عمرو دياب هينزل كليب لـ ألبومه الجديد إن شاء الله، وده الكليب إلى كل الناس منتظراه.. هيجري إيه والنبي لو الهضبة عمل الكليب مع بنت محجبة؟؟"
وأضافت: "عارفين هيجري إيه لو الهضبة عمل الكليب مع بنت محجبة بالستايل الجديد اللي في صور، ده اللي طالع للمحجبات عارفين أن طبعا عمرو دياب هو اللي بيطلع الموضة في أي كليب عارفين كام مطرب هيقلده؟؟ عارفين كام بنت هتحب شكلها بالحجاب؟؟ عارفين كام بنت ممكن تتحجب وتحب شكلها بالحجاب أكتر من شعرها؟ عارفين إن ده معناه أن الدين دين وسط مش هيمنع المحجبة أنها تظهر على الشاشة بالشكل اللي تحبه مش لازم الكليب يكون كله رقص ممكن يبقي أرقي من كده بكتر أوي".
وتابعت: "عارفين كام شركة ملابس ممكن تغتني لو عمرو دياب عمل كليب والموديلات اللي معاه محجبة؟؟ عارفين كام شركة إنتاج هتدعم الكليب ده؟؟ عارفين كم الحسنات اللي هتبقي في ذمة الهضبة لو عمل حاجة زي كده، عارفين الثقافة الجديدة والموضة الجديدة في عالم أزياء المحجبات اللي ممكن تحصل".
وأردفت: "أنا عارفه أن الفكرة ممكن تكون غريبة، بس هحاول أنشرها مش هخسر حاجة يمكن توصل للهضبة وتغير مفهوم الحجاب عن ناس كتير".
واختتمت حلمها قائلة: "ولو اللي بقوله ده جنان معلش استحملوا جناني كليب عمرو دياب والمحجبات"
