بالصور.. أطرف معاكسات الشباب..علي: «بقول لها يا قمر طلعت تجري».. شيرين:«عاكسني فضربته على قفاه».. كريم: «كان يوم أسود لما عاكست المعيدة».. حسن: «قالت لي إنت لسة صغير
روى رواد موقع التواصل الاجتماعي «فيس بوك»، مواقف تعرضوا خلالها للمعاكسات، أو قام أحدهم بمعاكسة الجنس الآخر، ولا يزال يعلق ذلك الموقف بأذهانهم لطرافته، أو كونه محرجًا، وذلك عبر «إيفينت» يحمل اسم «احكي لنا موقف معاكسة مش هتنساه».
- عاكست المعيدة
قال كريم: «أول أسبوع في الكلية عاكستها على السلم بمبدأ عاكس الوحشة وراضيها تكسب ثواب فيها، ربع ساعة لقيتها هي اللى بتشرح لي المادة في السكشن، طردتني بعد 5 دقائق، طلعت المعيدة للأسف».
- معاكسة ابن الجيران
أضافت أسماء: «مرة كنت ماشية أنا وأصحابي، وبكلم واحدة صاحبتي وباصة ناحيتها، وفي واحد ماشي جنبنا وبيعاكس، وأول ما بصيت لقيته ابن الجيران، أول ما شافني طلع يجري يا عيني».
- عاكست واحدة طلعت تجري
وروى علي: «كنت ماشي أنا وواحد صاحبي، وكان الجو حر وعطشان وكان ماشي قدامنا بنتين وواحدة منهم ماسكة قزازة ماية، فبقول لها يعني يوم ما أسرق هسرق قزازة ماية، فحطت القزازة في الشنطة وجريت».
- إنت لسة صغير يا حبيبي
وقال حسن: «وأنا في الإعدادية جيت أعاكس واحدة وبقولها إيه الحلاوة دي يا بت، قالت لي إنت لسة صغير يا حبيبي، اتكسفت».
- قالت لي مش هتعاكسني
وأضاف محمد: «حصلت معايا كنت في الشارع وبنتين ماشيين وأنا واقف، فلقيت واحدة منهم بتبصلي وتقول لي إيه مش هتعاكسني؟ قولت لها ليه هو أنا انتصيت في نظري، وتقريبًا صوتي كان عالي، والناس وقعوا على الأرض من كتر الضحك، خسارة إننا وصلنا للدرجة دي».
- ضربته على قفاه
وروت شيرين: «كنت خارجة من المدرسة ولد قرب مني جامد جدًا، روحت ضرباه على وشه بالقلم، وبعدين جيت أضربه تاني لقيت الواد وطى روحت ضرباه على قفاه، طبعًا كنت ماشية رجليّ بتخبط في بعض، وأصحابه قعدوا يقولوا إنت جدعة يا بت بميت راجل، ويصقفوا».
- إنت مالك هو بيعاكسني ولا بيعاكسك
وتذكرت فاطمة: «كنت لسة ثانوية عامة وكنا في مطروح والعائلة، وبتمشى جوة الماية أنا وبنت عمتي، وواحد ورانا شغال معاكسة وقت كتير جدًا فصلني، قومت لفيت عطيته قلم خدامين بضهر إيدي، رد فعله كان جامد الصراحة، جابني من شعري في الماية، أخويا الحمد الله طويل كان على الشط بس وصل لي في أقل من ثانية».
وقال عبد الله: «كنت ماشي أنا وواحد صاحبي، ففي بنت قمر كدة عندها نحو ما بين 10 أو 13 سنة، فالبيه عمر عمال يعاكسها.. يا عسل إيه الحلاوة دي يخربيت جمالك، وهي طبعًا أخدت في نفسها مقلب وبتبصلنا بكل تناكة، فبقول له يا عم عيب إكبر دي زي أختك يا أخي، راحت بنت الوارمة ترد تقول إنت مالك إنت هو بيعاكسني ولا بيعاكسك، ومن ساعتها بقيت أعاكس أنا وهو».
