كلمات عن السيسي.. طلقات على آخرين !
سنتكلم ببساطة.. بتلقائية.. بلا قيود.. بخليط من العامية والفصحى البسيطة.. فلا وقت لأي كلفة.. فرئيس مصر يفتتح المشروعات بـ"الفيديوكونفرانس" يعني بخاصية الاجتماعات المرئية.. من كتر المشروعات معندوش وقت يزور كل الأماكن وكل المحافظات ويربك كل الأجهزة معاه فضلا عن تكلفة زياراته! ومع ذلك كل مرة يتصيدون حاجة للراجل ويعملوا عليها مندبة ومحزنة وملطمة!.
رأينا في المعاهدة مع إسرائيل معروف وفي شروطها وفي قدرتنا على استثمار حرب أكتوبر المجيدة وقتها بمكاسب أكتر من كده ونؤمن أن الصراع مع إسرائيل صراع وجود وأن في يوم قادم هتنتهي فيه دولة الاحتلال حتى لو تأخر اليوم ده ألف سنة، لكنه قادم قادم لكن أنت إيه؟ اتفاجئت أن مصر ليها معاهدة مع إسرائيل؟ إيه؟ مكنتش تعرف سعادتك؟ ليه؟ كنت في غيبوبة ليك 40 سنة؟ أول مرة - يا عيني - تعرف أن مصر بتتوسط بين الأشقاء الفلسطينيين وبين العدو الإسرائيلي؟.
يا راجل ده مصر بتتوسط حتى لحماس وحتى في ظل تدهور العلاقات وتآمر حماس علينا! إيه اتفاجئت واتخضيت كده؟ وبتكذب زي الناس وتقول إن السيسي قال "سلام دافئ"؟، طيب راجع الفيديو كده هتلاقيه بيقول إنه "سلام غير دافئ ومش عايز أقول الكلمة التانية"، يعني يقصد "السلام البارد" وإن كلامه عن سلام دافئ حقيقي مرهون بقيام دولة فلسطينية مستقلة.. كمان بتتفرج ومبتفهمش؟، ثم تعالى هنا.. عايز السيسي يعمل إيه؟ يقول إنه رئيس لا يلتزم بتعهداته ولا معاهداته اللي التزم بيها كل رؤساء مصر بما فيهم بتاع الإخوان؟ عايزه يؤكد كلام الإخوان أنه "دموي وقاتل"؟، هتستحمل سعادتك الأوضاع الاقتصادية لو قامت حرب؟ هو أنت أصلا مستحملها دلوقتي ومن غير حرب؟ ويا ريتك ساكت إلا ليل ونهار حرايق بلسانك على كل حاجة!! هو إيه مافيش عقل خالص؟ كله حنجوري كده؟.
إيه؟ عايز السيسي يرسل قوات إلى سوريا؟ ليه؟ عايز السيسي يحارب مع مين هناك؟ مع الارهابيين اللي بيروج لكلامهم باسم يوسف وخالد علي وبلال فضل؟ طيب لو لأ وعايزه يحارب مع بشار طيب ساكت على النشطاء دول ليه؟ وموافق على هجومهم على أحمد آدم مثلا ليه؟ عرفت أنك متخلف أولا ومغرض ثانيا ومتناقض ثالثا؟ طيب هل بلدك عندها قدرة على إرسال قوات؟ ولو لديها قدرات فنية وعسكرية هل عندها قدرات مادية؟ مين اللي هيمول القوات المصرية ومعداتها؟ هتقول إنها تبعت طيران بس؟ ده روسيا عملت اتفاق مع أمريكا علشان الطيران ما يعملش مشكلات.. هنبعت إحنا إزاي؟ وهتستحمل إفساد العلاقات مع الخليج؟ إيه؟ هتحنجر بصوتك وهتقعد تقول استقلال القرار المصري؟.
ما هو مستقل، ولا هو الاستقلال في المشكلات بس؟ ولما يتوقف الدعم الخليجي هتعمل إيه سعادتك؟ هتقف جنب السيسي؟ ما انت قلت نفس الكلام ده قبل كده لو السيسي خد موقف مخالف للسعودية في سوريا وخده وطلعت انت كذاب ومنافق كالعادة! ثم تعالي هنا..مش مصر لها نصيبها وحصتها في الحرب على الإرهاب؟ ولا الحرب حلوة خارج البلاد؟ هل واقف أنت مع جيشك في حربه ضد الإرهاب هنا في بلدك؟ طيب وريني كده آخر حاجة كتبتها عن دعم الجيش كانت إمتى؟ يا نصاب.. إنت خايف تكتب أصلا لأنهم هيتهموك أنك بتطبل وأنك بعت القضية وإنك خلاص انبطحت!!.
لو تعرف أهمية محطة الكهربا اللي اتفتحت في أسيوط والكام مشروع اللي معاها لكنت فرحت بحجم الإنجاز هو واللي قبله واللي قبل اللي قبله واللي قبل اللي قبل اللي قبله.. إحنا بقينا أسبوعيا في إنجازات.. الناس بتتلخبط فيها.. لكنك على طول.. دورت على أي حاجة تشوه اللي بيحصل وتشغل الرأي العام بأي حاجة في كل افتتاح.. كل افتتاح.. إنت أصلا مش مصدق أن في مشروعات وعقلك بينكر لأنك أصلا في غيبوبة.. هو إنت أصلا بذمتك بيهمك شعب مصر؟ ولا أفراح شعب مصر؟ ولا المجهود الجبار كل يوم وفي كل مكان لأبناء شعب مصر؟ لكن هتروحوا اصلا من شعب مصر فين؟ خليكم ورا الإخوان وخليكم كارهين نفسكم وكارهين أي تقدم في بلدنا وخليكم خايفين من إرهاب أصدقائكم.. في كل الأحوال بلدنا ماشية إلى الأمام!
