ابقى زورني في المنام

يا اللى ساكن دار جديدة
في السما وأراضيك بعيده
واللي عالم بيها واحد
إبقى زورني في المنام
انت عارف أن بيتنا
يوم ما رحت يا بابا عجز
الحيطان بتبان حزينه
الكراسى والستاير والبيبان
زي ما تكون حاسه بينا
كل صورك، كل لبسك
حتى قلمك ولا ساعتك
زعلانين من بعد غيبتك
بس تعرف:-
كان في بالي اكتب قصيده
واقراهالك وانت بينا
واحكي فيها عن حياتنا، ذكرياتنا
أب عاش بيخاف علينا
ولما حس الموت بينده
كل خوفه كان فراقنا
الحياة بعدك كئيبه
زى مركب مات صاحبها
و سابها تايهه في الطريق
دا أنا باتمنى أكون في كابوس
أو تعبانه وفاقده الوعى
ويشكونى ب 100 دبوس
بس افوق،و اصحى ألاقيك
لسه بتضحك وسط النور
لسه بتحلم تحضر فرحى
وتشوف أصغر واحد شبهك
بقى دكتور
أنا حبيت النوم من بعدك
عندى شعور دايما ملازمنى
انك هتزورنى في احلامى
أصل غيابك خد من عمرى
نص حقيقته
وسابني بدور جوه منامي
على أحداث النص التانى