تفاصيل القبض على عضو فرقة «أطفال شوارع»
كشف محمد عادل، أحد أعضاء فرقة «أطفال شوارع»، تفاصيل جديدة في عملية القبض على «عز» أصغر أعضاء الفريق، والذي أكد أنه يعاني من مرض السكر، مشيرًا إلى أن أعضاء الفريق مطلوب القبض عليهم من جانب وزارة الدخلية.
وقال «عادل» في تدوينة له على «فيس بوك»: «مش هاقول إننا متفاجئين.. لأننا كنا عارفين تقريبًا أن فيه حاجة هتحصل.. عارف إن في ناس كتير عمالة بتلومنا وبتلومني شخصيًا بما إني كنت بزق الفريق دة دايمًا لأنه يعمل حاجات أكتر».
وأضاف: «قعدنا من يومين قبل آخر فيديو، وقلنا مش عاوزين لما نكبر نفتكر نفسنا ونفتكرها إنها كانت جبانة، نفوسنا مش جبانة بس يمكن اللي بيحصل يكون أكبر مننا شوية».
وأضاف: «الملف على مكتب وزير الداخلية، إحنا الستة مطلوبين، خمسة هربانين، وأصغر واحد فينا واللي عنده السكر مقبوض عليه».
ويستكمل قائلًا: «اتكلمت مع الشباب إمبارح، ويمكن محدش ندمان إننا وصلنا هنا لكن يمكن خايفين من المستقبل، مصر مخيفة أوي، مكنش ينفع منوصلش للمرحلة دي، عمرنا بيتغير قدام عنينا، بس مصر مصرة متتغيرش، عارف إننا نكرات في مسار الأحداث، لكن حياة الست نكرات دي اليومين دول بتتشكل، أو يمكن بتنتهي، واحد بيفكر ينتحر واتنين مبيفكروش، والباقي حتى مصدوم.. مصر بقت فعلاً مخيفة.. مش قادر أكتب الحرية لعز، وأنا أكتر واحد مش مصدق إنه هيطلع، إحنا كمان مش هنفضل برة كتير، الموضوع صعب، كل اللي أقدر أقوله في الآخر، متخافوش برة، إحنا مش هنخاف جوة».
يذكر أن أطفال شوارع هي مجموعة من الشباب، يصورون مقاطع فيديو غنائية ساخرة من الشوارع، وقد ذاعت شهرتهم في الآونة الأخيرة، وكان آخر مقطع فيديو نشرته المجموعة أمس، يتحدث عن "المواطنين الشرفاء"، والقبض على الشباب.
