إلا السند

السند.. من وجهة نظري أرقى وصف للعلاقات الإنسانية.. السند ده اللي تلاقيه وقت ما تحتاجه مهما كان احتياجك له تافه.. السند هو اللي يحب يشوفك سعيد بدون سبب ولا غرض ولا مقابل.. السند بيتعامل معاك بمحبة صافية بدون فواتير مؤجلة الدفع عند الحاجة.. السند بيتحملك في أوقات ضعفك ويقويك لما تتقفل أبواب الدنيا في وشك.. السند هو اللي في وقت سقوطك من نظر نفسك وفقدك الإيمان بقدراتك يقنعك إنك رائع ومختلف وقوي ومتفرد وهتغير الكون.. السند إيمانه بيك سند.. السند اللي يبادلك الكلام بكلام والجمال بجمال والجدعنة بجدعنة على سبيل العطاء بصدق مش على سبيل رد الديون.. السند بيهتم بتفاصيلك حتى لو متهمهوش.

يقدر شغفك حتى لو بعيد عن ذوقه.. بيشاركك تفاهاتك وهو سعيد بده.. مبيلومش عليك أي شيء مهما كان.. دايمًا لو عملت حاجة هو مكنش متوقعها منك بيدور لك على الأعذار حتى لو انت ملقتهاش لنفسك.. السند بيحتويك وقت ما الكون كله يتخلى عنك.. بيسمعك بتركيز ولو مش قادر يركز بيقولك بدون حرج عشان ميفوتش حاجه من كلامك لأنه فعلًا مهتم يسمع.. السند مفيش بينك وبينه حواجز من أي نوع لأن سوء الظن والفهم الغلط مش موجود بينكم أصلًا..

السند بتكون أنت سنده والعلاقة بينكم بتكون رايح جاي بدون حسابات.. السند ده اللي بتكون على طبيعتك وانت معاه بدون كذب ولا ادعاء ولا احتياج انك تتجمل بحاجات مش فيك.. السند ده هو الوحيد في الكون اللي مبتحاولش تعمل اللي يرضيه عشان تحافظ على علاقتك بيه وهو كمان زيك بالضبط.. بيكون على طبيعته معاك وبيكون حقيقي جدا قدامك بدون تمثيل أو نفاق.. السند ده غالبًا بيكون أب أو أم أو أخ أو صديق.. غير كده صعب إلا من رحم ربي.. لأن أي إنسان في الكون بيكون عايز منك حاجة.. أي حاجة.. المهم تسدد الفاتورة إن عاجلًا أم آجلًا.. إلا السند.. إلا السند.. إلا السند.. !!